Radarit nutaat 32-t Danmarkimi imartanik pitsaanerusumik nakkutiginninnissamut qulakkeerinnissaapput
Danmarkimi illersornissamut atortussianik suliffeqarfik Terma radarinik nutaanik inniminniiffigineqarpoq, radarit pineqartut pitsaanerusumik nakkutiginninnissamut isumannaallisaanermullu pitsanngorsaataassapput. Radarinit taakkunannga marluk Kalaallit Nunaanni inissinneqassapput.
Radarit nutaat Danmarkimi radarit pioreersut inigisaannut aallaaviusumik inississorneqassapput.
Asseq (toqqorsivimmit): Thomas Traasdahl/Ritzau Scanpix
Illersornissaqarfik radarinik nutaanik 32-nik sanatitsissaaq sineriammi nakkutilliissutitut atorneqartussanik.
Taamak tusagassiuutitigut nalunaaruteqarluni allappoq Illersornissaqarfiup Atortuuteqarfia Pisiniartarnermullu Aqutsisoqarfia (FMI).
Radarit nutaat radarit pisoqqat taarsernissaannut atorneqassapput, taakkunannga marluk Kalaallit Nunaanni inissinneqassallutik, ilanngullugu erseqqissaatigineqarpoq.
Danmarkip sineriaani radarit pitsaanerusumik nakkutiginissaanut atorneqassapput, illersornissamut Ministeri Troels Lund Poulsen (V) oqarpoq.
- Radarit sinerissamiittussat nutaat taakku naalagaaffittut namminersortuunerup illersorneqarneranut atuutsitsinermut nukittorsaaqataasassapput, nakkutiginneq pitsaanerulersissallugu kiisalu Danmarkimi imartani isumannaallisaassallutik.
- Tamanna aamma atuuppoq illersornissamut atortulersuutitsinnut navianartorsiortitsisunut kiisalu umiarsuit isumannaatsumik angalanissaannut, Troels Lund Poulsen nalunaarummi oqarpoq.
Ministerip oqarnera naapertorlugu "danskini isumannaallisaaneq pingaaruteqarpoq, imartatsinni pisut aqussinnaanissaat".
Radarit sinerissamiittut aamma atortulersugaapput umiarsuit Storebælt, Øresund aamma Femern Bælt aqqutigalugit ingerlasut umiarsuarnik allanik apunnginnissaat qulakkeerniarlugu.
Radarit siusinnerusukkut radartårnini Danmarkimiittuni inissinneqassapput.
Danskit illersornissamut suliffeqarfiutaata Terma-p atortulersuutinik pilersuisussaaq, naatsorsuutigineqarporlu tamanna 2025-miit 2026-mut pisassasoq.
Systemi atuutilissaaq tamakkiisumik ukiup tullia naatinnagu, nalunaarummi takuneqarsinnaavoq.
Radarinik nutaanik pisinissaq aalajangerneqarpoq politikkikkut isumaqatigiissuteqarnikkut danskit illersornissaat isumannaallisaanerallu 2024-2033, 2023-mi isumaqatigiissutigineqartoq tunngavigalugu.
Nalunaarummi takuneqarsinnaanngilaq radarit nutaat qanoq akeqarnersut, kisianni aningaasat Forsvarets materielbudget-imit aamma Accelerationsfonden-imit pissarsiarineqarput.
Kingulleq tassaavoq aningaasaateqarfik naalagaaffimmit pilersinneqartoq naalagaaffiup illersornikkut nukittorsarnissaa siuarsarniarlugu.
