Randi Vestergaard Evaldsen kommunaldirektørinngortoq

Kommune Kujalleq aasarli kommunaldirektøriusimasup Tine Parsip isumaqatigiissuteqarfia naammalli kommunaldirektørissarsiorpoq.

Maanna kommunip ajornartorsiortup taartissaminik nassaarsimanertik oqaatigaat, 41-nillu ukiulik Randi Vestergaard Evaldsen toqqarneqartoq atorfimmi ulloq 1. december aallartissaaq.

Air Greenlandimi charterchefitut atorfimmeernera, siusinnerusukkullu Kalaallit Nunaanni Brugsenimi pisortornermut pisortaasimallunilu Nukissiorfimmi pisortornermik suliaqarsimanera kommunip oqaatigaa.

Politikeriusimasoq

Randi Vestergaard Evaldsen aamma siusinnerusukkut politikeriusimavoq. 2015-mi 2018-milu Inatsisartunut qinigaavoq, taamattaarli 2014-mit 2016-mut Naalakkersuisunut ilaasortaavoq, piffissalu ilaani Demokraatini siulittaasuugallartuulluni.

2019-p kingorna namminersorlutik inuussutissarsiortuni sulivoq, 2020-milu, Demokraatit siulersuisui qimakkamigit politikimik ingerlatsiunnarpoq.

Randi Vestergaard Evaldsinip suleqatigilernissaa qilanaaralugu ,borgmester Malene Vahl Rasmussen (D) oqarpoq:

- Pisortatut aqutsinermi misilittakkanillu pigisaqarpoq, taakkulu Kommuni Kujalliup annertuumik iluaqutigissavai. Kommunalbestyrelsip tamarmiusup innersuussut tapersermassuk nuannaarutigaara, Malene Vahl Rasmussen oqarpoq.

Maniguulluni ataqqinnillunilu atorfinittoq

Kommune Kujalleq aappaagumut missingersuutinik inaarsaaleruttorpoq, tassanilu akileraarutinik qaffaanissaq milliuunilikkaanillu ileqqaaruteqarnissaq oqallisigineqarput.

Randi Vestergaard Evaldsenip sulilernissani qilanaaraa:

- Maniguullunga ataqqinnillungalu sulilissaanga nalunagu kommuni annertoorujussuarnik unammilligassaqarlunilu periarfissaqartoq, taanna oqarpoq imalu nangilluni:

- Kommunalbestyrelsip, sulisut kujataalu tamakkerlugu innuttaasut ineriartornermik nutaamik pilersitsinissami qanimut suleqatiginissaat, taamaaliornitsigullu nukippassuarnik periarfissarpassuarnillu piffiup pigisaanik atorluaalernissarput qilanaaraara.