Rektoriugallartup partiimi siulittaasoq naqqikkaa

Ilisimatusarfimmi ilisimatusartut ikilinatik amerlanerusut Ilisimatusarfimmi rektoriugallartoq Annemette Nyborg Lauritsen oqarpoq.

Ilisimatusarfimmi pissutsit pillugit Demokraatit siulittaasuata Jens-Frederik Nielsenip oqallinnissamik kissaateqarnerata kingorna taama qisuariarpoq. Politikeri §37 naapertorlugu ilisimatusarfimmi ineriartorneq pillugu arlalinnik apeqquteqarpoq. Naalakkersuisut kisitsisaataasa aamma takutippaat ilisimatusartut nunanit allaneersut ph.d.-mik ilinniagallit ikilisimasut.

Tamannali eqqunngitsoq Annemette Nyborg Lauritsen naqqiivoq. Ilisimatusartut nunatsinneersut nunanillu allaneersut Ilisimatusarfimmut attaveqartut aatsaat taama amerlatigisut taanna oqarpoq.

- Sumi inunngorneq apeqqutaalluni aningaasarsiaqarneq

Ilisimatusarfik atorfinitsitsisarnermut atatillugu "sumi inunngorsimaneq tunngavigalugu pissutsinut“ eqqaanarsinnaasumik periuseqarneq allanngortinneqarnerata kinguneranik kisitsisit taama isikkoqartut taassuma nassuiarpaa. Tassani ilisimatusartut Danmarkimit Københavnimi Kalaallit Sinniisoqarfiat aqqutigalugu qallunaat isumaqatigiissutaat malillugit atorfinitsinneqartartut.

ATUARUK AAMMA

Demokraatit: Ilisimatusarfimmi ernumassutigineqarpoq

- Aaqqissuussineq tamanna naleqqutinngilaq, ilisimatusartut taakku taamaalillutik Nuummi suleqatiminnit akissarsiaqarnerupput, sivisunermik sulinngiffeqarsinnaallutik angalasinnaatitaallutillu aamma ullormusiaqarsinnaallutik, Annemette Nyborg Lauritsen nassuiaavoq.

Ilisimatusarfik taama periuseqarunnaarluni ilisimatusartup nunamini universitetia toqqaannaq isumaqatigiissusiorfigineqartalersimasoq taanna oqarpoq.

- Taamaalilluta ilisimatusartup suliai universitetianut akilertalerpagut, ilisimatusartoq atorfinitsillugu isumaqatigiissusiorfiginagu, Annemette Nyborg Lauritsen oqarpoq.

Qinngasaarisarneq pillugu ilisimatusartoq suliffimmi pitsaanerusumik atugassaqartitsilissaaq

Sulisut arlallit kinaassutsiminnik isertuussisut Ilisimatusarfimmi aqutsisut siulersuisullu suleqatigiinnerisa ajornerat isumakuluutigalugu Ilinniartitaanermut Naalakkersuisoqarfimmut ukioq manna siusinnerusukkut allagaqareernerisa oqallinneq aallartippoq. Ilinniartitaanermut naalakkersuisup allakkatigut akissummini ilisimatusartut aqutsisullu taarseraannerat ’pissutsinik ilungersunartunik’ taavaa, taavalu sulinermi atugassarititat pillugit naliliinerup ersersimmagu suliffimmi atugassarititat eqqarsaatigalugit unammilligassaqartoq.

Allakkanut isumakuluutiginninnernut atatillugu Annemette Nyborg Lauritsenip siusinnerusukkut ilisimatitsissutigaa Ilisimatusarfimmi sulinermi avatangiisit pitsanngorsarneqarnissaannut suliniuteqartoqartoq. Imalu itisilerpaa:

- Aqutsisoqatigiit suliffeqarfimmi avatangiisit atugarissaarnerlu pillugit piffissami matumani suliniuteqarluarput, tamannalu qinngasaarinermik ilisimatusartumit ilisimaneqarluartumit Helle Rabøl Hansenimit siulersorneqarpoq. Suliniutinut taakkununnga suleqatigiit peqataalluarnerat malunnarpoq.

- Oqaloqatigisigut

Annemette Nyborg Lauritsen marsimi raktoriugallartutut atorfinippoq. Taassuma siulersuisut naalakkersuisoqarfillu suleqatigilluarlugit oqarpoq. Rektoriugallartutut ikkutinngikkallarami qanoq pisoqarsimanersoq oqaatigisinnaanagu oqarpoq.

Ilisimatusarfimmi pisortaagallartup ilisimatusarfik pillugu oqallinneq nuannaarutigaa, aammali peqataatinneqarnerunissaq kissaatigaa:

- Kissaatigaara uagut pilluta oqallinnatik uagut toqqarluta oqaloqatigisassagaatigut, Annemette Nyborg Lauritsen oqarpoq.