KL

DK

Kunngi Frederik aamma Dronning Mary Pituffimmut mipput

Rosa Kanuthsenip kalaallisoorluni Kunngikkut tikilluaqquai

Kunngip nuliatalu Kalaallit Nunaannut tikeraarnerminni apuuteqqaarfiannit assilisat takukkit.

Pituffimmi innuttaasut Kunngikkormiunik tikilluaqqusisut
Naalakkersuisut siulittaasuat, Múte Bourup Egede aammalu Rosa Kanuthsen kalaallisoorlutik Kunngikkut tikilluaqquaat.
Kunngi Frederik aamma nulia Dronning Mary Pituffimmi innuttaasunik ilassuisut.
Kunngikkormiunik tikittoortut erfalasumaarput.
Inersimasut meeqqallu Pituffimmi Kunngikkormiunik tikilluaqqusisut.
Julia Aka Wille
Tusagassiortoq
Saqqummersinneqarpoq

Kunngikkormiut nunatsinnut tikeraarnerminni apuuffigeqqaagaat tassaavoq Pituffik Space Base, tassani ilaatigut Naalakkersuisut siulittaasuannit, Múte B. Egede-mit (IA) tikilluaqquneqarput. Mittarfiup illutaata silataaniipput Pituffimmi innuttaasut amerlasuut kalaallit aamma danskit erfalasuannik erfalasulerlutik kunngikkormiunik tikilluaqqusillutik.

Tikilluaqqusisut ilagaat Rosa Kanuthsen, taassuma toqqarsimavaa kalaallisuulerluni tikilluaqquseqataassalluni. Aallaqqaammut taanna nalinginnaasunik atisaqarluni mittarfimmukarsimagaluarpoq, isummanili allanngortikkamiuk angerlamut kalaallisuuleriartupallassimavoq. Taamaalilluni kalaallisoorluni persuarsiorlunilu Kunngi nulialu Dronningi assammillugit nunatsinnut tikilluaqquai.

- Uannut annertuumik isumaqarpoq, tassami angajoqqaama Kunngi Frederik aamma Dronning Ingrid 1952-mi Qaqortumi naapinnikuuaat. Taamaattumik ullumikkut maaniinninni Kunnginngorlaaq nulialu tikilluaqquseqataaffigisinnaagakkit immikkut ittumik misigisaavoq, Rosa Kanuthsen oqarpoq.

Angalanermi Qaanaaq tullinnguuppoq

Ukiut 20-it matuma siorna, taamanikkut Frederik Kunngissaaluni Mary nunatsinnut angalaqatigeqqaarmagu Rosa Kanuthsen Pituffimmi aamma najuuppoq.

- Kunngitut Dronningitullu siullerpaamik angalanerat maanna siullerpaajuvoq, uagullu kalaallit Kunngikkormiulerituujuvugut, taamaammat uannut pingaaruteqarpoq maaniinnissara, Rosa Kanuthsen, Pituffimmi ukiut 28-it sinnerlugit sulisimasoq oqarpoq.

Aamma Monna Christensen, ukiut pingasut sinnerlugit sakkutooqarfimmi sulisimasoq, kunngikkormiunik tikilluaqquseqataanissaminut assut qilanaarsimavoq.

- Tamatta nuannaarpugut, taamaalillunimi aamma Kunngip ersersippaa maani Pituffimmi kalaaleqarlunilu danskinik inoqartoq, amerikarmiut kisimik maaniinngitsut, Monna Christensen oqarpoq, ulloq manna persuarsioqataanermini  kunngikkormiutut niaqoruteqarnissaminik aalajangersimasoq.

Ullumi arfininngornermi juunip 29-ani angalasut Qaanaamukassapput, ullullu ingerlanerani Qaanaameereerunik Aasiannut ingerlaqqissapput, tassani Kunngikkormiut umiarsuaat Dannebrog ikiffigissavaat, tikeraarnerullu sinnerani Kunngikkut umarsuarmi tassani najugaqassapput.

Kunngikkut angalanertik nunatta avannaarsuani aallartippaat ullumi juunip 29-ani, angalanertillu naammassissavaat Narsami Qassiarsummilu juulip arferngani.

pituffik inuiaqatigiit kongepar kongebesøg kong frederik samfund

ATORFIIT Se alle jobs

Powered by Labrador CMS