KNR
Rosannguaq Rossen KNR-mi siulittaasutut tunuarpoq
KNR-ip ajornartoornermik nalaataqaqqasup siulersuisuini siulittaasutut qaammatit marluk sinnilaarlugit atuuteqareerluni, Rosannguaq Rossen siulittaasutut tunuarpoq. Siulittaasussamik nutaamik Naalakkersuisut toqqaanissaasa tungaanut, Miki Jensen siulittaasutut atuuteqarallassaaq, KNR-imit tusagassiutinut nalunaarummi tamanna ilisimatitsissutigineqarpoq.
Rosannguaq Rossen KNR-ip siulersuisuini siulittaasutut inissisimavoq qaammatit pingasut ataallugit.
Toqqorsivimmit assi: Leiff Josefsen
Rosannguaq Rossen nalunaarpoq KNR-ip siulersuisuini siulittaasutut atuuffimminit tunuarluni imatut tunngavilersuuteqarluni:
- Atorfimmut pigama ilisimavara atorfik unammillernartoqassasoq, illup iluani avataanilu unammillernartunik naapitsiffiusartussaalluni. Massakkorpiaq KNR-ip siulersuisuini suliassat ima piumasaqaatitaqartigipput, suliffigisanni sulisutut tutsuiginassusera attatiinnassagukku, siulittaasuuinnassaguma attatiinnarsinnaanagu. KNR-ip ajunnginnerpaamik siunissaqarnissaa qulakkeerniarlugu aalajangerneq pivoq.
Februaarip aallaqqaataani Mette Steenholdt KNR-ip siulersuisuini siulittaasuunerminit tunuarpoq, Rosannguaq Rossenillu martsip 28-ani kingoraarpaa. Naalakkersuisut siulittaasumik nutaamik toqqaanissaata tungaanut, siulersuisuni siulittaasup tullia, Miki Jensen, siulittaasuugallassaaq.
