Raajarniutit angissusaannik killiliisoqarnera Polar Seafoodimut aalisarnermut akitsuutinit akileraarutinillu A-nit 66 millionit koruunit angullugit annaasaqaataassaaq. Aammattaaq maanna umiarsuarni raajanik tunisassiortuni inuttat 32 millionit koruunit angullugit akissarsiassaraluaminnik annaasaqassapput, namminersortut aalisarnermik ingerlatsiviisa annersaannit Polar Seafoodimit tamanna naatsorsorneqarpoq.
Namminersorlutik Oqartussat ingerlatseqatigiiffiutaannut Royal Greenlandimut killilersuineq sunniuteqassanngilaq.
Raajarniutit angissusaannik killiliisoqarnera Polar Seafoodimut aalisarnermut akitsuutinit akileraarutinillu A-nit 66 millionit koruunit angullugit annaasaqaataassaaq. Aammattaaq maanna umiarsuarni raajanik tunisassiortuni inuttat 32 millionit koruunit angullugit akissarsiassaraluaminnik annaasaqassapput, namminersortut aalisarnermik ingerlatsiviisa annersaannit Polar Seafoodimit tamanna naatsorsorneqarpoq.
Namminersorlutik Oqartussat ingerlatseqatigiiffiutaannut Royal Greenlandimut killilersuineq sunniuteqassanngilaq.
Qeqertarsuup Tunuani raajarniutit killilerneqarnerat Royal Greenlandimut qanoq kinguneqassava?
- Maannakkut pissutsit eqqarsaatigalugit nalunaarut Royal Greenlandimut kinguneqartitsissanngilaq, pisortap tullia Lars Nielsen oqarpoq, ilanngullugulu oqaatigalugu ingerlatseqatigiiffik sumiiffimmi pineqartumi tunisassiorfimmik umiarsuaateqanngitsoq.
Naleqqussaanissamut siunnersuut
Taamaakkaluartoq pisortap tulliata nalunaarutip, Naalakkersuisut aalajangerpata ukiortaamiit atuutilersussamut, naleqqussaanissaa kissaatigaa.
- Assersuutissaalluartut tassaapput raajarniutit minnerit namminersortut peqatigalugit pigisavut ukiumut 1.500 tonsinik aalisartartut arfineq-marlunnillu inuttallit. Angallatit taakku amerlanerusut katersorneqarsinnaagaluarpata umiarsuarnullu 45 meterit missaannik takitigisunut 4.500 tonsinik usisinnaasunut 20-llu missaannik inuttaqarsinnaasunut aningaasaliisinnaasuugutta aalisarneq pitsaanerulissagaluarpoq umiarsuarmilu sulinermi atugassarititaasunut pitsanngorsaataassagaluarluni, Lars Nielsen oqarpoq, nangillunilu:
- Nalunaarummili siunnersuutigineqartumi aalisariutit takinerpaamik 40 meterisut takissuseqarsinnaapput, naak aalisariutit amerlanerit 45 aamma 50 meterit akornanni takissuseqartaraluartut. Neriuppugut killiliussaq tamanna nalunaarutip akuersissutigineqartinnagu eqqarsaatigeqqinneqarumaartoq, taamaalilluni aalisarnermut inatsimmi periarfissat siunertarineqartut killilersorneqassanngimmata.
Tamat oqartussaaqataanerannut ernumanartoq
Aalisarnermut sinaakkutissatut siunnersuutit nutaat kalaallit aalisarnerannut ajunaarutaasumik kinguneqassasut nalunaarutillu nutaap suliarineqarnera ernumanartoq Polar Seafood isumaqarpoq.
Sapaatit-akunneri sisamat tusarniaanissamut piffissaliunneqarnerat, naalakkersuisullu tusarniaanermi akissutinik tamanik aalajangiinermut ilanngussinissamut ullunik marlunnik piffissalerneqarnerat, tamatumalu kingorna umiarsuaatileqatigiiffiit ullunik qulinik malittarisassanut nutaanut naleqqussarnissaminnut piffissaqartinneqarnerat Polar Seafoodimit isornartorsiorneqarpoq. Taakkualu tamanna "tamat oqartussaaqataanerannut ernumanartumik“ taavaat.
- Politikerit isummavut tusarusunngitsutut iliornerat Kalaallit Nunaanni namminersortut sulisitsisuisa annersaattut ajornartorsiutit isigaarput. Naleqartorujussuit pineqarput, umiarsuaatileqatigiiffinnut, aalisartunut inuiaqatigiillu aningaasaqarnerannut. Paasissutissat tamaasa piginagit ingerlaannaq aalajangiineq kingunerlutsitsingaatsiarsinnaavoq, Miki Brøns, Polar Seafoodimi pisortaaneq, tusagassiuutinut nalunaarummi oqarpoq.
Arriinnerusumik suliarineqarli
Polar Seafood nalunaarummit eqqugaasussanik marlunnik umiarsuaateqarpoq.
- Naalakkersuisut namminneq sulisuminnut taama annertutigisunik allannguisariaqarsimagaluarunik inatsisitigut piumasaqaatit malillugit tusarniaanerit mianersoqqusinerillu ingerlanneqartussaagaluarput, aalisartut assigusunik naammassinninnissaannik peqquneqaraangata taamaattoqartanngilaq.Inuussutissarsiutinut allanut sanilliullugu aalisarnermik inuussutissarsiuteqartuusugut nalorninartorsiorneruneq sungiusimavarput, kisianni politikkikkut nalorninartorsiornerulersitsinissamut pissutissaqanngitsoq isumaqarpugut, Miki Brøns erseqqissaavoq, politikkerinullu kaammattuutigalugu arriinnerusumik suleqqullugit, kingunerisinnaasaanik naatsorsuisoqassasoq oqaloqatigiinnermullu qaaqqusisoqassasoq.
- Raajarniarneq TAC-mik appasinnerusumik eqqugaareerpoq. Siunissami ukiorpassuarni kinguneqartussanik aalajangiipallannissaq maanna piffissaanngilaq, Polar Seafoodip pisortaanera Miki Brøns oqarpoq.
Tusarniaanermi killigititaq
Nalunaarutip akerleriissutaasup tusarniutigineqarnera decembarip 19-inut killeqarpoq, tamakkiisumillu uani atuarneqarsinnaalluni:
Aalisarnerup teknikikkut iluarsartuussivigineqarnera pillugu Namminersorlutik Oqartussat nalunaarutissaattut siunnersuut
