Royal Greenland Danmarkimi sulisoqarnerpaavoq
Ingerlatsivinni namminersorlutik oqartussanit pigineqartuni Royal Greenland Danmarkimi amerlanerpaanik sulisoqarpoq, Naalakkersuisut siulittaasuata Múte B. Egedep naatsorsuusiaanit tamanna erserpoq.
Royal Greenland
Namminersorlutik Oqartussat ingerlatseqatigiiffiutaat Københavnimilu Kalaallit Nunaata Sinniisoqarfia qanoq amerlatigisunik Danmarkimi sulisoqarnersut, Naleqqami politikkerip Hans Enoksenip paaserusuppaa.
Danmarkimi 161-inik Kalaallit Nunaannilu 1.449-nik Royal Greenland sulisoqartoq paragraf 37 naapertorlugu akissummi ilisimatitsissutigineqarpoq. Kalaallit Nunaanni sulisunut sanilliullugit taakkunannga 10 procentii Danmarkimi sulisuupput.
Kalaallit Airports procentinngorlugit sulisoqarnerpaavoq
Namminersorlutik oqartussat ingerlatseqatigiiffiutaanni sulisut Danmarkimi najugaqartut Kalaallit Nunaanni sulisunut sanilliullugit Kalaallit Airportsimi sulisut amerlanerpaapput. Kalaallit Nunaanni sulisunit 19-iusunit sisamat Danmarkimi najugaqarmata 17,4 procentiupput. Air Greenlandimi 12,2 procentiupput.
Takussutissaq ima isikkoqarpoq:
KNI/Polaroil: Kalaallit Nunaanni sulisunit 812-iusunit Danmarkimi sulisut pingasut (0,4 procentit)
Royal Arctic Line: Kalaallit Nunaanni sulisunit 697-iusunit Danmarkimi sulisut 45-t (6,1 procentit)
Tusass: Kalaallit Nunaanni sulisunit 328-usunit Danmarkimi sulisut 16-it (4,7 procentit)
Kalaallit Airport: Kalaallit Nunaanni sulisunit 19-iusunit Danmarkimi sulisut sisamat (17,4 procentit)
Air Greenland: Kalaallit Nunaanni sulisunit 583-iusunit Danmarkimi sulisut 81-it (12,2 procentit)
Royal Greenland: Kalaallit Nunaanni sulisunit 1.449-sunit Danmarkimi sulisut 161-it (10 procentit)
Múte B. Egedep akissutaani aamma allassimavoq Nukissiorfiit Danmarkimi sulisoqanngitsut, Kalaallit Nunaata Sinniisoqarfiani sulisut 12-iusut sulisullu Naalakkersuisoqarfinneerlutillu kalaallit ingerlatseqatigiiffianeersut 25-usut.
