USA-mi præsidentip Donald Trumpip “ulloq aniguiffiusumik” taasani apriilip pingajuanni nalunaarutigimmagu suliffeqarfiit amerlasuut piviusumut allarluinnarmut appakaapput.
Ulloq taanna ikittuinnarnut aniguisitaaffittut ippoq, nunarsuarmimi nunat amerlanerpaartaat akitsuusiiffigai. Kalaallit Nunaat ilanngullugu, akitsuut nalinginnaasoq 10 procentiusoq nunatsinni atulerpoq.
USA-mi præsidentip Donald Trumpip “ulloq aniguiffiusumik” taasani apriilip pingajuanni nalunaarutigimmagu suliffeqarfiit amerlasuut piviusumut allarluinnarmut appakaapput.
Ulloq taanna ikittuinnarnut aniguisitaaffittut ippoq, nunarsuarmimi nunat amerlanerpaartaat akitsuusiiffigai. Kalaallit Nunaat ilanngullugu, akitsuut nalinginnaasoq 10 procentiusoq nunatsinni atulerpoq.
Nunatsinniit avammut tunisassiat aalisarnermeersuuvoq, taamaammallu Royal Greenlandip pissutsit aamma malinnaavigilluarpai. Qujanartumillu annertuumik eqqugaavallaarpasinngillat.
- Maannakkut sunniutaa killeqarpoq, USA-mut avammut tunisartakkatta ilarpassui - saattuaanerusut - Canadameersuupput, taamaattumillu akitsuutinit nutaanit eqqugaasussaanatik.
- Tunisassiat Kalaallit Nunaanneersut maanna procentinik qulinik akitsuuserneqartut suli piumaneqarluarlutillu akii aalajaapput, taamaattumik pisut sunniuteqarluartumik iliuuseqarfigisinnaavagut, Royal Greenlandimi tuniniaanermut pisortaq Robert-Jan Treebus Sermitsiamut allakkatigut akissuteqarluni oqarpoq.
Niuerfittut suli pingaarutilik
Royal Greenland nunarsuarmi suliffeqarfiit eqqugaanerattut sunnerneqarpallaanngikkaluarluni akitsuutit nutaat pimooruppaat.
- Killelersugaanngitsumik niuersinnaaneq Royal Greenlandimit tapersersorparput. Akitsuusersuinerup tunisassiornerup iluani annertuumik akornusersuipput, tunisassiornermullu iluanaaruteqarpallaanngitsumut unammillernarlutik.
- Nunarsuarmi proteinit pilerfiisa annersaat nunat akornanni niuernikkut aaqqiagiinngissuteqarnermit eqqugaasoq ajuusaarnarpoq, taamaattoqarnerami inuussutissarsiut sulisorpassualik aningaasarpassuarnillu nalilik tatineqarnerulerpoq, Robert-Jan Treebus oqarpoq.
Taamaattumik niuernikkut pissutsit allanngornerannut naleqqussarlutik iliuuseqassapput, ilaatigut pisariaqaleriasaassagaluarpat niuerfiit allat misissorneqarlutik.
- USA Royal Greenlandimut niuerfiuvoq suli pingaarutilik, maannakkullu ineriartornermut eqaannerusumik aalajaannerusumillu naleqqussarnissatsinnut piareersimavugut.
Aalisakkat Danmark aqqutigalugu avammut tunisat 2024-mi 3,5 milliardit koruunit missaanniittut Naatsorsueqqissaartarfiup kisitsisaataanni takuneqarsinnaapput.
