AALISARNEQ PILLUGU INATSISSAQ
Royal Greenlandimut piumasaqaatit annertusineqartussanngorput
Naalakkersuisut siulittaasuat oqaatigaa Royal Greenlandip ataatsimeersuarnerani Naalakkersuisut piumasaqaataat sukannernerusut saqqummiunniarlugit, tassani ingerlatseqatigiiffiup qullersaqarfiata 100 procentimik Kalaallit Nunaanniissasoq aammalu ingerlatseqatigiiffiup nunatsinni suliaqarnerata annertusineqarnissaa sulissutigineqassasoq piumasaqaataassapput.
Aalisarnermut inatsisissatut siunnersuutip aappassaaneerneqarnissaa 11. maj pisussaq sioqqullugu politikkikkut piumasaqaatit annertusiartornerat malunnarpoq. Maanna Naalakkersuisut siulittaasuata erseqqissaatigaa Royal Greenlandimut piumasaqaatit sukaterneqassasut.
Assiliisoq: Leiff Josefsen
Suut ilumoorpat suullu eqqunngitsumik paasissutissiineruppat Naalakkersuisut aalisarnermut inatsisissatut siunnersuutaannut tunngatillugu? Aalisarnermut Piniarnermullu Naalakkersuisoq, Kim Kielsen (S) aamma Naalakkersuisut siulittaasuat, Múte Bourup Egede (IA) marlunngornermi ullaakkut tusagassiortunik paasissutissiillutik aggersaapput.
Ilisimaneqartutut aalisarnermut inatsisissatut siunnersuut maanna ataatsimiititaliatigut suliarineqarpoq, aammalu Naalakkersuisut erseqqissaatigaat inatsisissatut siunnersuut siunnersuutigineqartutut iluseqarluni imaluunniit allannguuteqarluni naammassineqassanersoq, imaluunniit kingusinnerusukkut ukiakkut ataatsimiinnermi kingusinnerusukkulluunniit inaarutaasumik suliarineqarnissaa kinguartinneqassanersoq Inatsisartut kisimiillutik aalajangigassarigaat.
Paasissutissiinerlunnerit uppernarsaatitaqanngitsunillu taamaassorinninnerit
Aalisarnermut inatsisissamut tunngatillugu soqutigisaqartut tamarmik maanna oqaaseqarsimalereerput siunnersuut qanoq isumaqarfiginerlugu, siullermik 2017-imi Inatsisartunut siunnersuutip saqqummiunneqaraluarneranut atatillugu, tamatumalu kingorna aalisarnermut ataatsimiititaliarsuup sulineranut atatillugu (december 2019 - juli 2021), maannakkut siunnersuutip saqqummiuteqqinneqarneranut atatillugu tusarniaanermi akissutit aqqutigalugit (29.11 2023 - 24.01. 2024) aamma maannakkut Inatsisartut suliamik ingerlatsinerannut atatillugu.
Kisianni aalisarnermut inatsisissatut siunnersuut oqallinnermik annertuumik pilersitsiviuvoq aamma uppernarsaateqanngitsunik taamaassorinninnernik imalinnik allaat siammarterisoqarluni. Ullaarlu manna Naalakkersuisut tusagassiortunik inissiiniarput:
- Erseqqissaatigissavara matumani tusagassiortunik paasissutissiinerput immiunneqarmat, taamaalilluta aamma tusagassiorfinnit eqqunngitsumik saqqummiussisoqassagaluarpat illersorsinnaaniassagatta, tassami ajoraluartumik tusagassiorfinnit saqqummiussaqarnerit ilaatigut oqaatsivut killorneqartangaaramik ilisarsaajunnaarlugit paatsoorneqarsinnaasunngorlugillu saqqummiunneqartarmata, Bourup Egede nassuiaavoq.
Royal Greenlandip immikkut inissisimanera
Politikerit ilaat peqataasoralugit Royal Greenland ulluni makkunani immikkut sammineqarpoq aamma uppernarsaateqanngitsunik taamaassorinninnernik eqqunngitsunillu ilaartukkanik oqallittoqarpoq.
Tassami Naalakkersuisut siunnersuutigaat Royal Greenlandip aalisarnermut inatsisissatut nutaami atugassarititaasut allanngortinneqassanngitsut, kisianni namminersortut umiarsuaatileqatigiiffiit atugassarititaasut ajorseriartortinneqassallutik.
Kielsen aamma Bourup Egede nassuiaapput Royal Greenlandip illersorneqarnissaa qanoq pingaaruteqartiginersoq, tassami ingerlatseqatigiiffik inuiaqatigiinnit pigineqarmat aammalu inuiaqatigiinnut annertuumik pisussaaffeqarmat.
- Inatsisissatut siunnersuummi siullermeersumi qulequtaq tassaavoq "Kalaallit Nunaanni aalisakkanit isumalluutit kalaallit inuiaqatigiit ataatsimut pigaat.." Taamaattumik siunnersuutigaarput Royal Greenlandimut, kalaallit inuiaqatigiinnut pigisaasumut, ullumikkutut piumasaqaatit atuuttut nangittumik atuutsinneqassasut, Aalisarnermut Piniarnermullu Naalakkersuisoq, Kim Kielsen (S) oqarpoq.
RG-p ataatsimeersuarnerani piumasaqaatit annertuut naatsorsuutigineqarsinnaapput
Royal Greenlandimut piumasaqaatit allanngortinneqanngillat kisianni pisariaqartitsisimavoq aalisarnermut inatsisissaq taamak iluseqarluni akuerineqassanngippat, tassa RG-mut atugassarititaasut ajorseriartinneqassappata oqaluttuarissallugu angerlarartitsinerit aammalu tunitsivinnik tunisassiorfinnillu matooraassariaqarnerit avaqqunneqarsinnaajunnaassasut, taamatuttaaq tusarparput suliffeqarfiup akiitsuni pillugit unammillernartumi inissisimasoq, aalisarnermut inatsisissatut siunnersuut ingerlatseqatigiiffimmut annaassiniutaava?
- Naamik, arlaannaatigulluunniit aalisarnermut inatsisissaq ingerlatseqatigiiffimmut annaassiniarnerunngilaq, aalisarnermut inatsisissatut siunnersuut selskabimut annaassiniarnertut isumaqanngilaq. Periarfissanik assigiinngitsunik nalilersuisimavugut, pingaarnertut qulakkeerniarlugu pisuussutit uumassusillit inuiaqatigiit kalaallit pigisarigaat, nalilersuereerlutalu pissusissamisoornerpaasutut nalilerparput RG-mut piumasaqaatit maannakkut atuuttut aalisarnermut inatsisissatut siunnersuummi ingerlateqqinneqassasut, Naalakkersuisut siulittaasuat, Múte Bourup Egede (IA) erseqqissaavoq.
Kisianni ingerlatseqatigiiffimmut piumasaqaatit qanoq ittut saqqummiunneqassappat, ingerlatseqatigiiffimmi ullumikkut nunani allani aningaasalersuinera annertoorujussuuvoq aamma assersuutigalugu aalisakkat qaleruallillu nunatta imartaani pisarineqanngitsut nunani allani suliarisarpai, tusaamavarput aamma ingerlatseqatigiiffiup suliai nunani allani iluatsinngitsut arlaqartut, soorlu Chilemi. Naalakkersuisut aamma siullermeerinninnermi nalunaarutigaat RG-p atugassarititaasutigut ajorseriaateqartinneqannginneratigut naatsorsuutigineqassasoq ingerlatseqatigiiffimmut piumasaqaatit sukaterneqassasut?
- Uanga piginnittut sinnerlugit maanna nalunaarutigisinnaavara ataatsimeersuarnermi (17. maaji 2024, aaqq.) arlalinnik piumasaqaateqassamaaratta ingerlatsivimmut. Siullertut ingerlatseqatigiiffiup nunatsinni tunisassiorneq aalisarnerlu salliutissagai aammalu nunami aggerfigisamini, tassa maani aningaasaliinerussasoq. Aappaattut ingerlatsivik qullersaqarfimminik maani Kalaallit Nunaanni katersuutsitsissasoq, marlunnik qullersaqarfeqarneq ingerlaannarsinnaanngilaq, ingerlatseqatigiiffik maanngaaniit ingerlanneqartariaqarpoq. Allat piumasaqaatit kingusinnerusukkut saqqummiunneqassapput, tamanna pisassiissutinut tunisassiornerullu nunatsinniit aallaaveqarnerunissaanik tunngaveqarpoq. Ingerlatseqatigiiffiit inuiaqatigiit pigisaat tamarmik pilersinneqarnerminni siunertaat qitiutillugu ingerlatsisoqartariaqarpoq, tassalu inuiaqatigiit kalaallit kiffartuussassarigamikkit aammalu inuiaqatigiit inerisaanissaanni annertuumik tapertaasussaassagamik, taamaalillutillu nunaminni ineriartortitsinissamut peqataanissaminnut pisussaaffeqaramik, Naalakkersuisut siulittaasuat, aamma namminersorlutik oqartussat sinnerlugit piginnittuunermut akisussaasoq, Múte Bourup Egede (IA) akivoq.
