Rusland: Lavrov aamma Rubio telefonikkut oqaloqatigiipput ataatsimiinnissaq pillugu
Ruslandip præsidentia, Vladimir Putin, aamma amerikamiut præsedentiat, Donald Trump, Ungarnimi naapissasut naatsorsuutigineqarpoq.
USA-p nunanut allanut ministeria, Marco Rubio, aamma Ruslandip nunanut allanut ministeria, Sergej Lavrov, ataasinngornermi telefonikkut oqaloqatigiipput nunat taakku marluk præsidentiisa naapinnissaat piareersarneqartoq pillugu.
Assiliisut: Jim Watson, Pavel Bednyakov/Ritzau Scanpix
Ruslandip nunanut allanut ministeria, Sergej Lavrov, aamma USA-p nunanut allanut ministeria Marco Rubio, ataasinngornermi "siunnerfeqarluartumik ataatsimeeqatigiipput", Ruslandip præsidentiata, Vladimir Putinip, aamma amerikamiuni præsidentiata, Donald Trumpipo, akornanni ataatsimiinnissaq pillugu.
Reuters naapertorlugu Ruslandip nunanut allanut ministeria ataasinngornermi taamak nalunaaruteqarpoq
Præsidentit pineqartut taakku marluk sisamanngornermi oqarasuaatikkut oqaloqatigiipput nalunaaquttap akunnerini marlunni affarmilu sivisussusilimmik, kingornalu Trumpip nalunaarutigaa, Putinilu ataatsimeeqatigiinniarlutik sapaatit akunnerisa tulliuttut marluk iluanni Ungarnip illoqarfiata pingaarnersaani, Budapestimi.
Suli nalunarpoq, qaqugorpiaq ataatsimeeqatigiinneq pissanersoq.
Tallimanngornermi Kremlinip oqaaseqartartua, Dmitrij Peskovip, erseqqissaatigaa, nunanut allanut ministerit marluk taakku oqaloqatigiittariaqartut, ataatsimiinnissaq sioqqullugu aaqqitassanut assigiinngitsunut aaqqiissutissanik pilersitsiniarlutik.
Nutaarsiassaqartitsivik Reuters allappoq.
- Apeqqutit amerlaqaat, isumaqatigiinniutissat pillugit suleqatigiissitaliortoqassaaq ilaallu ilanngullugit. Taamaattumik suliassat immikkoortukkuutaarlugit suliarineqassapput, kisianni soorunami præsidentit piumassuseqarput, Peskov oqarpoq.
- Ataatsimiinnissaq sapaatip akunnerisa marluk tulliuttut iluanni pisinnaalluarpoq imaluunniit kingusinnerusukkut pisinnaavoq. Paaseqatigiissutigineqartoq nalinginnaasoq tassaavoq, kinguarsaasoqartariaqanngitsoq.
Peskov ilanngullugu oqarpoq, Ukrainemi sorsunneq unitsillugu eqqisseqatigiinnissamut aaqqiissutissamik nassaarnissamut Rusland suli ammasoq.
Ruslandip Ukraine aamma Europami nunat iligisai pisuutippai eqqissinissamut isumaqatigiinniarnerit uninngasimanerannut.
Ukrainep Rusland pisuutippaa piumasaqaatinik akuerineqarsinnaanngitsunik saqqummiussisimanera pillugu, aamma Putin eqqissinissamik pilersitsinissamik ilungersuussinngitsoq.
Tallimanngornermi Kreml aamma nalunaarpoq, Putin aamma Ungarnip ministeriunerat, Viktor Orbán, ataatsimiinnissaq pillugu tallimanngornermi oqaloqatigiissimasut, aamma Ungarn ataatsimiinnissamik qaaqqusisuunissaminut piareersimasoq.
