Rusland Ukrainelu Tyrkiami ataasinngornermi ataatsimiinnissamut nutaamut piareersartut
Ukrainep piumasaqaatitaqanngitsumik sakkuaakkunnaarallarnissaq, tigusallu iperagaanissaat kissaatigaa. Rusland kissaatiminik saqqummiussinngilaq.
Assimi qanittumi Kyivimi Ukrainemiut Tyrkerillu ataatsimiinnerat takutinneqarpoq. Tyrkia nunat sorsuuttut USA-llu peqataaffigisaanik ataatsimiinnissamik ingerlatsinissamut neqerooruteqarpoq.
Assi: Handout/AFP/Ritzau Scanpix
Ukraine ataasinngornermi
Ruslandimik Istanbulimi Tyrkiami nutaamik isumaqatiginninniarnissamut
aallartitsissaaq.
Taama Ukrainep præsidentiat
Volodymyr Zelenskyj, sapaammi Telegramimi allattoq Reuters nalunaarpoq.
Ukrainemiut aallartitaat
illersornissamut ministerimit Rustem Umerovimit siulersorneqassapput.
Taamattaaq nunap nunanut allanut ministeria tulleq peqataassaaq, soorluttaaq
Ukraine sakkutuuinut kilitsissiaqarfianullu sinniisut aamma peqataassasut.
Russinit Vladimir Medinskij,
naalakkersuisunut siunnersorti takkutissaaq.
Zelenskyj naapertorlugu
piumasaqaatitaqanngitsumik sakkuaakkunnaarallarnissaq, tigusat iperagaanissaat
meeqqallu tammarsimasut Ukrainemut utertinneqarnissaat Ukrainep kissaatigaa.
Sapaatip akunnerani
siusinnerusukkut Rusland ataatsimiinnissamik siunnersuuteqartuuvoq.
Ruslandip Ukrainemik
isumaqatigiissutissatut saqqummiussani siusinaarluni saqqummiukkumanngikkaa,
AFP allappoq.
Russit præsidentiat, Vladimir
Putin, ataatsimiinnerup nunat pineqartut marluk pisortaasa akornanni
ingerlanneqarnissaanik Tyrkiap siunnersuutaa itigartippaa.
Tyrkiami ataatsimiinneq
Ukrainep Siberiami russit timmisartuinik 40-nit amerlanerusunik dronit
atorlugit saassussinerata kingorna ullup ataatsip qaangiunnerani
ingerlanneqassaaq.
Ukrainemi
kilitsissiaqarfimmit tusarfiup aterminik taasinngitsup, Ukraine timmisartunik
saassusisuusoq, Reuters nalunaarpoq.
Timmisartut arlallit
Ruslandimi nunap immikkoortuini tallimani droninik saassussinerup
ikuallalersimasut, Russit illersornissamut ministereqarfiat nalunaarpoq.
