Ruslandip Ukrainellu eqqissinissamik isumaqatigiinniarnerat pingasunngornermi unnukkut aallartissaaq
Ruslandimiut aallartitaat eqqissinissamik isumaqatiginninniarnernut peqataajartorlutik Tyrkiamukarput, Ruslandimi oqaaseqartartoq oqarpoq.
Ukrainep Ruslandillu eqqissinissamik isumaqatigiinniarneranni Ukrainemiut aallartitaat Ciragan Palasimit Istanbulimiittumit juunip aallartinnerani aninerannita assi. (Assi toqqorsivimmi).
Assi: Murad Sezer/Reuters
Ruslandimit aallartitat Ruslandip illoqarfiisa pingaarnersaannit Moskvamit Tyrkiami illoqarfissuarmi Istanbulimi Ukrainemik eqqisseqateqarnissamik isumaqatigiinniarnissaminnut pingasunngornermi ullaap tungaani aallarput.
Reuters naapertorlugu Ruslandip præsidentiata Vladimir Putinip oqaaseqartartuata Dmitry Peskovip tamanna uppernarsarpaa.
Pilersaarutit naapertorlugit oqaloqatigiinnerit pingasunngornermi unnukkut aallartissasut taanna oqarpoq.
Isumaqatigiinniarnerit ajornaatsuinnaassanngitsut aamma oqaatigaa.
Ruslandimit aallartitat aallarsimasut russit nutaarsiassaqartitsiviisa arlallit pingasunngornermi siusinnerusukkut paasivaat.
Ukrainimiut aallartitaat Istanbuliliartut Ukrainemi atorfilik atiatigut eqqaaneqanngitsoq AFP-mut oqarpoq.
Ruslandimit aallartitanut pingaarit sisamat immikkullu ilisimasallit sisamat ilaasut Ruslandimi nutaarsiassaqartitsivik Tass allappoq.
Isumaqatigiinniarnerit nunani nalunaaqutaq malillugu arfineq-marlunut, tassa Danmarkimi nalunaaqutaq arfinernut, aallartissasut, Tass nangilluni allappoq. Tyrkiamiut tv-kkut nutaarsiassaqartitsiviat TRT Haberip nutaarsiassiinera aallaavigalugu russit nutaarsiassaqartitsiviat allappoq.
Nutaarsiassaqartitsivik naapertorlugu Ciragan Palasimi, ullumikkut akunnittarfinngortinneqarsimasumi, isumaqatigiinniartoqarnissaa ilimagineqarpoq.
Ukrainep Ruslandillu, 2022-miilli sorsuuttut, Tyrkiami isumaqatigiinniarnerisa pingajussaraat.
Isumaqatigiinniarnerit ingerlaqqinneranni "tupinnartuliornikkut angusaqartoqarnissaa“ ilimagineqanngitsoq Ruslandip ministeriunera Dmitry Peskovip marlunngormat oqarpoq.
Ruslandip "aallaqqaammulli“ soqutigisani anguniakkanilu anguniarlugit iliuuseqarniartoq Peskovip erseqqissaatigaa.
Isumaqatiginninniarnerit siulliit maajip 16-ianni pimmata, Ruslandip Ukrainellu ukiut pingasut ingerlanerani isumaqatiginninniarlutik ataatsimeeqatigiinnerat aatsaat taamak annertutigaaq.
Taakku juunip aappaani naapeqqipput.
Nunat taakkua tigusanik paarlaasseqatigiittarnissartik maannut taamaallaat isumaqatigiissutigaat, sorsunnerlu suli ingerlalluni.
Rusland Ukrainemi Donetskip eqqaani kangiani piffissami kingullermi sakkortuumik saassussisaarpoq.
Ukrainemit isumaqatigiinniaqqinnissamut piareersimasoqartoq arlaleriarluni oqariartuutigineqarpoq, Ukrainelli Ruslandimut ilanngunnissaa ammaffiginagu.
/ritzau/
