Ruslandip Ukrainellu tigusaminnik paarlaasseqatigiinnissaannik nalunaaruteqartoqarpoq
Paasissutissiisartoq naapertorlugu Ruslandip Ukrainellu tigusanik 90-inik paarlaasseqatigiinnissaat ilimagineqarpoq, tamannalu De Forenede Arabiske Emiratimik isumaqatigiissutigineqarsimavoq.
Juunip 29-ani Ukrainemiut Ruslandimi tigusaaqqareerlutik Ukrainemut uternerannit Ukrainep illersornissamut ministereqarfiata assit saqqummiuppai.
Handout/Ritzau Scanpix
Ruslandip Ukrainellu pingasunngornerup ingerlanerani tigusanik 90-inik paarlaasseqatigiinnissartik pilersaarutigaat.
Nutaarsiassaqartitsivik Reuters naapertorlugu paasissutissiisartoq atiminik isertuussisoq Bloombergimut suliamik ilisimasalik taama oqarpoq.
Tamanna isumaqatigiinniarnernit, De Forenede Arabiske Emiratip akuliunneratigut ingerlanneqartunit, pissagunarpoq.
Reutersip paasissutissat taakku allanit uppernarsartissinnaasimanngilai.
Russit Ukrainemiullu atorfilittat, siornatigut tigusanik paarlaasseqatigiinnernut assingusunut siuttuusimasut, Reutersip apeqqutaanut suli akissuteqanngillat.
Ukrainemi inuit pisinnaatitaaffii pillugit kommissæri Dmytro Lubinets Ruslandimut tigusanik paarlaasseqatigiittoqarnissaa pillugu oqaaseqarsimanera sapaatip-akunnerata siuliani Ukrainemi tusagassiorfiit arlallit nalunaarutigaat.
Tusagassiuutit naapertorlugit naalakkersuisut, De Forenede Arabiske Emiratit peqatigalugit, „annertuumik“ parnaarussat paarlaasseqatigiinnissaannut Ruslandi isumaqatigiissuteqarfigisimagaat oqarsimavoq.
AFP naapertorlugu qaammatini 27-ni sorsunnermi Ruslandip Ukrainellu tigusaminnik 50-eriarlutik amerlanerusoriarlutilluunniit taarseeqatigiittarsimapput.
Juunimi kingullermik paarlaateqatigiinnermi, aamma De Forenede Arabiske Emiraterimit akuliuffigineqartumit, Ruslandip Ukrainelu tamarmik immikkut tigusanik 90-inik tunniussipput.
Qaammatit tallimat ingerlanerini aatsaat taama amerlatigisunik paarlaaqatigiipput. Januaarimi nunat taakku marluk tamarmik immikkut sakkutuunik 100-nik tigusaminnik imminnut tunniussivigipput.
Ukraine timmisartumik Ukrainemiunik 65-inik tigusarineqarsimasunik timmisartumik nakkartitsisimasutut Ruslandip unnerluutigimmaguli, tamanna siullerpaamik paarlaaqatigiinneruvoq.
Sorsunnermi illuatungeriit tamarmik immikkut qassinik tigusaqarnersut naluneqarpoq, tigusalli tusindilikkuutaasut isumaqartoqarpoq.
Ukiut marluk matuma siorna februaarimi russit sakkutuui Ukrainemut isaaffiginnipput.
/ritzau/
