Sakkortuumik nakuuserneq filmiliarineqarpoq — 29-nik ukiulik tigummigallarneqartussatut eqqartuussaasoq
Sermersuup Eqqartuussiviani angut 29-nik ukiulik tigummigallarneqartussatut eqqartuunneqarpoq. Angut suliami annertuumi arlalitsigut pisuutinneqarpoq, ilaatigut toqutseriarsimasutut peqqarniitsumillu nakuusersimasutut. Angutip pinngitsuutinneqarniarluni eqqartuussut suliareqqitassanngortippaa.
Assiliisoq: Merete Lindstrøm
Suliaq annertooq pingasunik unnerluutiginnittulik Sermersuup Eqqartuussiviani naammassineqaqqammerpoq.
Angut 29-nik ukiulik piffissaligaanngitsumik tigummigallarneqartussatut eqqartuunneqartoq, unnerluutigineqartullu allat marluk 30-nik aamma 28-nik ukiullit ukiup aappaa avillugu qaammatillu sisamat pineqaatissinneqarsimasunut inissiisarfimmiittussanngortinneqartut, Kalaallit Nunaanni Politiit tusagassiuutinut nalunaarummi ilisimatitsipput.
Politiit naapertorlugit angut 30-nik ukiulik 29-nillu ukiulik siorna septembarip aappaaniilli pineqaatissinneqarsimasunut inissiisarfimmiipput, tassanilu inatsit tunngaviusoq naapertorlugu killisiorneqarnerminni angummut inuusunnerusumut Nuummi Nuussuarmi pisiniarfiup Akikip eqqaani peqqarniitsumik nakuusersimasutut unnerluutigineqarput:
Saassunneqartup niaquata saarnga innarlerpoq
- Tassani saassunneqartoq niaquagut timaatigullu arlaleriarlutik tilluarlugulu tukertarpaat, saassussinerlu minutsit sisamat sinnerlugit sivisussusilik filmiliaralugu, politiit allapput.
Tamatuma saniatigut qaammatit pingasut tamatuma siorna 29-nik ukiulik toqutseriarsimasutut pisuutinneqarpoq:
- Eqqunngitsuliorfigineqartoq 29-nik ukiullip inissiaanut pisinnaatitaanani isersimavoq, tamatumalu kingorna unnerluutigineqartup angut nakuuserfigisimavaa. Tamatuma kingorna angutip unnerluutigineqartup ikaap toqqavianik 3,5 kilonik oqimaassusilimmik angut niaquagut anaatarpaa niaquata saarnga innarlerlugu, suliarineqarniarlunilu Danmarkimukaanneqartariaqalerpoq, politiit allapput. 29-nik ukiulik aamma unnerluutiginnissutini arfineq-pingasuni allani pisuusutut eqqartuunneqarpoq.
Pinngitsuutinneqarniarluni suliareqqitassanngortitsisoq
Angutip 29-nik ukiullip tigummigallarneqarnissaanik eqqartuussiviup aalajangernera sakkortuumik nakuusersimaneranik toqutseriarsimaneranillu tunngaveqartoq, politiit ilisimatitsipput:
-Nakuusernermik minutsit sisamat sinnerlugit sivisussusilimmik filmililiornera aamma isiginiarneqarpoq, tarnikkullu misissuineq tunngavigalugu tigummigallarneqassasoq Nakorsat siunnersuisoqatigiivi inassutiginnipput, politiit allapput.
Unnerluussisup Signe Suhrip eqqartuussut naammagisimaarpaa, unnerluussisup unnerluussummi oqaaserisimasaanut naapertuummat.
Angutip 29-nik ukiullip 28-nillu ukiullip eqqartuussutit suliareqqitassanngortippaat pinngitsuutinneqaqqullutik, 30-nillu ukiullip eqqartuussut akueraa.
