Sakkutooqarfiup pisortaata soraarsitaannginnermini Danmarkimik suleqatigiilluarnertik pingaartippaa
Amerikamiut sakkutooqarfiata pisortaata sulisuminut soraarsitaannginnermini allagaa DR-ip takuaa.
Susannah Meyers (saamerleq) USA-p præsidentiata tullersortaa, J.D. Vance (talerpilleq), nuliaalu, Usha Vance, naapippai, taakku marsip naalernerani Kalaallit Nunaannut tikeraarmata.
Foto (arkiv): Jim Watson/Reuters
Pituffik Space Base-mi maanna pisortaasimasunngortoq, Susannah Meyers soraarsitaanngitsiarnermini allakkamini ersersippaa sakkutooqarfiup Danmark suleqatigilluaraa.
Allakkap Susannah Meyersip nassiussaata, DR-ip pissarsiarisimasaata tamanna ersersippaa.
- Naqissuserpara pingaarutilimmik ataavartumillu tapersersuineq, nunat tamarmik ullut tamaasa sakkutooqarfitsinnut tunniuttagaat, ukiunilu 75-ni taamaaliorsimasut, taanna allappoq DR-ip allakkamik nutserinera naapertorlugu.
Pituffik Space Base tassaavoq siornatigut Thule-base, marsip naalernerani amerikamiut vicepræsidentiata, J.D. Vancep, annertuumik oqallisaaqisumik tikeraagaa.
Tikeraarnermini Danmarkip Kalaallit Nunaanni suliniutai pillugit taanna sakkortuumik isornartorsiuivoq.
- Oqariartuutivut Danmarkimut ersarippoq: Pitsaasumik suliaqarsimanngilasi. Kalaallit Nunaanni innuttaasunut isumannaatsuunissaanullu annikippallaartumik aningaasaliiffiginnissimavusi. Tamanna allanngortinneqartariaqarpoq, Vance tikeraarnermini sivikitsumi ilaatigut oqarpoq.
Allagaq Susannah Meyersimeersoq nassiunneqarsimavoq tikeraartoqareernerup kingorna sakkutunut Pituffik Space Basemiittut, tassani allakkami J.D. Vanceimik ataatsimeeqatiginninnermi kingorna imaqarniliornerulluni.
Allakkami ilaatigut eqqaavaa "suleqatit pingaarutillit" tassaanerarlugit Issittumi Sakkutuut, Kalaallit Nunaanni Politiit aamma danskit sulisut basemiittut.
USA-mik taakku tapersersuipput "ullut tamaasa ulloq unnuarlu", taanna nangilluni allappoq DR naapertorlugu.
Susannah Meyers tallimanngormat soraarsitaavoq "sakkutooqarfimmik siuttuunissaminut piginnaasakippallaarmat tatigineqarsinnaannginnera" pissutigalugu, amerikamiut sakkutuuisa qullersaqarfianit taamak nalunaaruteqartoqarluni.
Meyers sakkutooqarfimmi pisortanngorpoq ukioq kingulleq juulimi.
Sean Parnell, amerikamiut illersornissamut oqaaseqartartuusoq, attaveqaqatigiittarfimmi X-mi soraarsitsinermut pissutaasut pillugit allaaserinnippoq.
Taanna allappoq, "sulisut aqutsisoqatigiinnut akornusersuutaasut imaluunniit præsident Trumpsip pilersaarutaanik akornusersuisut, illersornissaqarfimmit akuerineqassanngitsut".
Vancep tikeraarnera aamma sakkutooqarfimmi pisortap soraarsinneqarnera pipput, amerikamiut præsidentiata, Donald Trumpip, arlaleriarluni oqaatigereeraalu, Kalaallit Nunaat aqussallugu kissaateqarluni.
Taassuma aamma sakkutuulersorluni anguniarsinnaanissaa siumoortumik itigartinngilaa.
Illersornissamut atortulerrsuutit Pituffik Space Base-miittut 1952-imi piareerneqarput, taamanili USA Kalaallit Nunaanni najuunnini attatiinnarpaa.
Siusinnerusukkut USA-p sakkutooqarfiani tassani sinerissallu sinnerani sakkutuut tusintilikkaat najuussimapput. Maannakkut sakkutuut 150-it missaanniipput.
Danmarkip USA-llu akornanni illersornissamut isumaqatigiissut 1951-meersoq naapertorlugu amerikamiut illersornissatigut Kalaallit Nunaanni inerisaasinnaanermigut annertuumik pisinnaatitaaffeqarpoq.
