ILLERSORNISSAQ PILLUGU ISUMAQATIGIISSUTIP ILASSUTAA 2
Sakkutuut umiarsuaannut talittarfik nutaaq Nuummi pilersinneqassaaq
Illersornissamut ministeriaqarfik, Naalakkersuisut aamma Sikuki Nuuk Harbour A/S isumaqatigiipput illersornissaqarfimmut talittarfimmik pilersitsisoqassasoq Nuup umiarsualivittaavata allilerneqarneranut atatillugu. Sikuki Nuuk Harbour A/S-ip talittarfiup pilersinneqarnera, pigineqarnera aqunneqarneralu isumagissavai.
Asseq: Illersornissamut ministeriaqarfik
OBS: Talittarfik pillugu isumaqatigiissummi paasissutissat ersarinnerusut ilanngunneqarput Sikuki Nuuk Harbourimit saaffiginnittoqareernerani marlunngornermi 14. oktober.
Nuummi innuttaasut ukiut ingerlanerini takusarsimassavaat illersornissaqarfiup sakkutuuisa imarsiortut umiarsui qasertumik qalipaateqarlutik ilisarnartut, kilisaatit umiarsuillu allat Nuup eqqaani imaani kisaqqallutik uninngasut.
Taamaattoqarneranut pissutaasut pingaarnerit ilagaat Nuup umiarsualivia ukiuni kingullerni mikivallaalersimammat umiarsualivimmilu inissat killeqalersimallutik.
Ilassutitut isumaqatigiissut 2-mi illersornissaqarfiup talittarfissaa pillugu imatut allassimasoqarpoq
Kalaallit Nunaanni umiarsuit angallannerat annertusiartorpoq. Umiarsuit takornariartaatit, aalisariutit il.il. amerlanerusut Nuummi talittarnerat annertusiartuinnarpoq, tamannalu illersornissaqarfiup umiarsuisa umiarsualivimmi talissinnaanerannut periarfissanik killilersuivoq.
Isumaqatigiissut naapertorlugu Illersornissaqarfiup umiarsuaataat Nuummi umiarsualivimmik annertusaanissamut atatillugu talittarfimmik immikkut ittumik peqalissapput.
Talittarfik illersornissaqarfiup atunngikkaangagu aamma allanit atorneqarsinnaavoq, taamaalillunilu inuiaqatigiinnut iluaqutaasinnaalluni.
Tusarfik: Illersornissamut ministeriaqarfik
Tassunga atatillugu illersornissamut ministeriaqarfik aammalu Namminersorlutik Oqartussanit pigineqartoq, Sikuki Nuuk Harbour A/S, illersornissamut isumaqatigiissutip immikkoortuani immikkoortoq 2-mi isumaqatigiissuteqarput suleqatigiillutik illersornissaqarfiup talittarfissaanik pilersitsinissaq, taama allappoq illersornissamut ministeriaqarfik tusagassiorfinnut nalunaarummi.
Kilisaatit illersornissaqarfiullu umiarsui paarlaapput
Sakkutuut umiarsuaannut talittarfiliortoqarnissaannut isumaqatigiissuteqartoqarnerani Nuummi talittarfiup tallilerneqarnissaanut suliariumannittussarsiuussinissami suliassaq annertunerulerpoq.
Sikiku Nuuk Harbour A/S Nuummi talittarfiup allilerneqarnissaanut akuersissutaateqareerpoq, talittarfillu kilisaatit saniatigut allanit aamma atorneqarsinnaasussaalluni.
Isumaqatigiissusiortoqareernerani Nuummi talittarfik 35 miiterisut takitigisumik ilaneqartussatut suliariumannittussarsiuunneqartussanngorpoq. Sikuki Nuuk Harbourimi pisortaaneq John Rasmussen ilisimatitsivoq taakkunannga 200 miiterit kilisaatinut talittarfittut suli atortussaapput. Taakkulu saniatigut sakkutuut talittarfissaat 150 miiterisut takitigisoq ilassutaassaaq. Taannalu talittarfik sakkutuut umiarsuaannit atorneqartigani, isumaqatigiissut malillugu allanit atorneqarsinnaasassaaq.
350 meterisut takitigisoq immallu itissusaa 10 meterit missaanni
Kilisaatit talittarfissaat 10,5 miiterisut itissuseqassaaq, sakkutuullu talittarfissaat 12 miiterisut itissuseqartumiissalluni.
- Aalajangiisuulluinnarpoq, illersornissaqarfimmut pitsaanerpaamik sulinissamut atugassaqartitsinissaq Kalaallit Nunaata imartaani suliassaminnik isumaginnissinnaanerat eqqarsaatigalugu, illersornissamut ministeri, Troels Lund Poulsen, oqarpoq nangillunilu:
- Taamaattumik assut naammagisimaarpara illersornissaqarfik Sikuki Nuuk Harbour suleqatigalugu illersornissaqarfimmut umiarsualivimmik pilersitsiniarmata, taamaalilluni illersornissaqarfiup umiarsuisa immikkut ittumik talittarfeqalersinneqassammata.
Nuummi umiarsualiviup allineqarnissaa pillugu neqerooruteqartitsineq 2025-mi ukiakkut aallartinneqarnissaa naatsorsuutigineqarpoq, naatsorsuutigineqarporlu talittarfik 150 meterinik takissuseqassasoq taamatullu immap itissusaa 10 meterit missaanniissasoq.
Dual-use suliniut: Inuiaqatigiinni angallannermut talittarfik atorneqarsinnaavoq
Illersornissaqarfiup talittarfia allanit atorneqarsinnaassaaq, illersornissaqarfik imaluunniit iligiit umiarsuisa atunngikkaangassuk, sakkutuujunngitsut talittarfik atorsinnaassavaat. Taamaalilluni umiarsualiviup allilerneqarnera aamma innuttaasunut iluaqutaasinnaassalluni.
- Illersornissaqarfiup suliassaminik ingerlatsineranut Kalaallit Nunaanni nukittorsaanermi Naalakkersuisut kissaatigaat, suliniutit amerlanerpaat Kalaallit Nunaanni inuiaqatigiinnut iluaqutaasinnaasut. Illersornissaqarfiup talittarfittaava Nuummi tikilluaqqunarpoq dual-usetut suliniutaammat, aamma Nuummiit Nuummullu sakkutuujunngitsut angallannerannut annertusiartuinnartumut tapertaasinnaammat. Tamanna ajunngitsuusoq nalilerpara, nunanut allanut tunngasunut ilisimatusarnermullu Naalakkersuisoq Vivian Motzfeldt oqarpoq.
Sakkutuut talittarfissaat Sikuki Nuuk Harbour A/S-imit pilersinneqassaaq, pigineqassaaq aqunneqassallunilu, Nuummi umiarsualiviup ilaatut.
Illersornissaqarfiup Kalaallit Nunaanni suliaminik ingerlatsineranut nukittorsaassaaq
- Inunnik angallannermik ineriartornerup pitsaasup ilutigisaanik, ilaatigut umiarsuit takornariartaatit amerliartorneranni, Illersornissaqarfik Nuup umiarsualiviani taliffissat killeqarneranik unammilligassaqarpoq. Taamaattumik qularutissaanngilaq, Nuummi talittarfiup allilerneqarnera illersornissaqarfiup Kalaallit Nunaanni ingerlatsineranut nukittorsaassasoq, kiisalu illersornissaqarfiup Nuup mittarfia nutaaq nunarsuarmiut akornanni annertunerusumik atorluarsinnaassallugu, Issittumi Sakkutuut pisortaat, generalmajor Søren Andersen oqarpoq, nangillunilu:
- Illersornissaqarfiup umiarsuisa talittarfittaarneratigut aamma suliffeqarfiit sumiiffimmiittut illersornissaqarfimmullu pilersuisut annertusarneqassapput minnerunngitsumillu Sikuki Nuuk Harbourimik suleqatigiinneq qanittumik ingerlasoq nukittorsarneqassalluni. Taamaattumik aamma nuannaarutigaara illersornissaqarfiup talittarfiata umiarsuit allat taliffigisinnaasaattut atorneqarsinnaassammat.
