Peqqissutsimut oqaaseqartartup Anna Wangenheimip (D) Nuummi sulisunut inissiat akisuut pillugit ernumanera annertusiartuinnarpoq. Dronning Ingridip Napparsimmavissuani sulisussanik atorfinitsitsiniarnermi init akisuallaarnerat aporfiuvoq.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit taamaallaat atuarneqarsinnaapput.
Atuarluarna.
Peqqissutsimut oqaaseqartartup Anna Wangenheimip (D) Nuummi sulisunut inissiat akisuut pillugit ernumanera annertusiartuinnarpoq. Dronning Ingridip Napparsimmavissuani sulisussanik atorfinitsitsiniarnermi init akisuallaarnerat aporfiuvoq.
Nuummi Qatserisunit inissiat attartortittakkat qanoq ingerlanersut AG-p peqqinnissaqarfimmi aqutsisut apeqquteqarfigigaluarpai. Peqqinnissaqarfiup aqutsisui apeqqutinut akissuteqanngilaq.
Anna Wangenheimili inissiat qiviaannarlugit qanoq inissisimasoqarnersoq takuneqarsinnaasoq isumaqarpoq.
- Inissiat portusuut sanioqqullugit pisukkaangama takusinnaasara tassaavoq inissiat ikittuinnaat attartorneqarsimasut, oqarpoq.
- Inissiap aappaa sulisut iserternissaannut piariingajalerpoq. Inoqannginneranili kikkut akiliissappat? aperaaq.
Peqqinnissaqarfimmi aqutsisut inissianillu attartortitsisartut isornartorsiuineq siusinnerusukkut akissuteqarfiginikuuaat. Tassani erseqqissarlugu attartornermut akiliutit inissiat sananeqarnerannut akimut attuumassuteqartut, Nuummilu inissiat attartortittakkat namminersortut attartortittagaasa akigititaannut assigusut, aap, akikinnerullutilluunniit.
Taarsiiffiginninneq
Nuup qeqqani inissiat pillugit AG-mi upernaaq allaaserinneqattaarpoq. Sulisunut init akisuallaarneri pissutigalugit nakorsat pingasut atorfimminnit soraartut taamani allaaseraarput – namminneq oqarnerattut sulisut inaannut akiliutitut neriorsuutigineqartumit akisunerujussuullutik.
AG-p allagaatinik takunnissinnaaneq aqqutigalugu pissarsiarisaani atuarneqarsinnaavoq peqqinnissaqarfimmi sulisut Nuummi inissiamik qaammammut 3.500 koruuninik attartorsinnaanerannik neqeroorfigineqarnissaannik ilimasaarneqarsimasut.
Ininut ataatsimik sinittarfilimmut akiliut akikinnerpaaq. Akisunerpaaq 6.500 koruunit missaanniippoq.
Qatserisunili inissiat iserterfigeriaannaat qaammammut 11.000 koruunit 17.500 koruunillu akornanni akeqarput.
Peqqissutsimut naalakkersuisup Agathe Fontainip (IA) isornartorsiuineq qisuariarfigalugu suliamut aaqqiissutissamik suligasuartussanik suleqatigiissitaliorniarluni neriorsuinikuuvoq. Suliarlu pillugu oqaaseqaqqitsigani suleqatigiissitaliap inassuteqaatai utaqqeqqaarniarlugit Fontainip aamma oqaatiginikuuaa. Wangenheimip suliap ingerlarnga pakatsissutigaa.
- Piffissap taama sivisutigisup ingerlareernerani politikerit akuutinneqaratillu nalunaarusiamik paasitinneqannginnerat pimoorussinnginneruvoq, Demokraatit peqqissutsimut oqaaseqartartuat oqarpoq, namminerlu aaqqiissutaasinnaasutut siunnersuuteqarpoq inatsisinut maanna atuuttunut malinninngitsumik:
- Peqqinnissaqarfimmi sulisut inuiaqatigiinnut pingaaruteqartunik suliaqarnerminni najugaqarsinnaaniassammata taarsiiffigineqarsinnaapput. Taamaalillutik sulisut aningaasaqarniarnertik annaasinnaassavaat. Aamma sulisut ineqarnermut tunngatillugu suliap ingerlasup toqqaannartumik kingunerisaanik soraartarnerat sulisunut artukkiinermik kinguneqannginnissaa anguneqarsinnaavoq. Akuersaarneqarsinnaanngilaq, piffissamilu matumani napparsimasut amerlanerusut Danmarkimukarlutik nakorsanik immikkut ilisimasalinnit passunneqarsinnaanerat katsorsarneqarsinnaanerallu aallartinneqartariaqarnissaat aarlerinaateqarpoq. Napparsimasunik Danmarkiliaassisarnermut nakorsiartitsisarnermullu maanna 100 millionit koruunit atorneqartarput, Wangenheim oqarpoq.
Tarnimikkut napparsimasut
Peqqinnissaqarfimmi immikkoortortani assigiinngitsuni sulisussarsiorneq sulisunillu ataavartumik atorfeqartitsiniarneq ajornakusoorluinnareerpoq. Tarnikkut nappaatilinnut sullissisut tatineqarnerujussuat AG-mi kingullermi saqqummertumi allaaserineqarpoq. Maannakkut pissutsit imaapput, nakorsat sulisullu immikkut ilinniarsimasut amerlasuut sivikitsumik sulinissamut akuersisartut.
Tamanna ataavartumik sullissinissamik ajornakusoortitsivoq, tamatumalu saniatigut sulisussanik nutaanik atorfinittunik ilinniartitsisarnermik nukippassuit atorneqartarlutik.
- Suli ernumanarneruvoq Nuummi uninngasinnaasut amerlineqarnissaat, sulisummi amerlassusaat malinnaasinnaanersoq qulakkeerneqassanersoq nalunarmat, Wangenheim oqarpoq, tarnikkut napparsimasunut qanoq kinguneqassanersoq eqqaallugu:
- Naammattumik sulisussaqannginnerput pissutigalugu inuit annaaneqartarput. Tarnikkut napparsimasunut sulisut ikippallaarnerat kommunillu ikiorsiisinnaanerat killeqarnera pissutigalugit napparsimasut ajornerpaat, ajunngitsumik inuuneqarnissaminnik isumagineqarnissamik tapersersorneqarnissamillu pisariaqartitsinerpaasut, sumiginnarneqartarput.
- Naalakkersuisut nalunnginnerpaat tarnikkut nappaatillit atugarliortut aningaasat naleerukkiartorneranni qanoq amerlatigisut piitsuungaarlutik inuunersut? aperaaq.
