Sassaalliineq tupaallannartoq: Timmisartumi nerisassani kikiassuaq
Marlunngornermi juulip 16-ianni Narsarsuarmit Københavnimut nerisassanut sassaalliutigineqartunut timmisartumut ilaasoq tupaallappoq. Frikadellit ilaanni Aviâja Kielsen Andersenip nerisimasaani kikiassuaqarpoq.
Narsarsuup Københavnillu akornanni timmisartumik angalanermi ilaasut ilaata nerisassat tupaallaatigisimavai. Nerisaanimi kikiassuaqarpoq.
Toqqorsivimmit assilisaq, Sermitsiaq
Marlunngornermi juulip 16-ianni Narsarsuarmit Københavnimut timmisartukkut angalanermi frikadellit, naatsiiat salatit iffiarlu sassaalliutigineqarput. Ilaasut ilagaat Aviâja Kielsen Qaqortumeersoq, taassumalu Sermitsiamut oqaluttuaraa nerisassanik sassaalliisoqarnerani kaassimaqaluni:
Aviâja Kielsen Andersen Københavniliarluni timmisartumut ilaatilluni ilimaginngisaminik sassaallerfigineqarpoq. Frikadellip iluani kikiassuaqarpoq.
Asseq nammineq pigisaq
- Nerisassat sassaalliutigineqartut mamarpaseqaat, suut tamarmik isikkoripput, nerisassallu mamarput. Frikadellerli kiigakku saviminersunnippoq, Aviâja Kielsen Andersen misigisani pillugu oqaluttuarpoq.
Air Greenlandip frikadellit Narsarsuup Københavnillu akornanni ilaasunut sassaalliutigisai kikiassuartaqarput.
- Tamanna ilimaginngikkaluarpara. Angalanerup sinnerani qanera saviminersunniinnaavippoq nererusussutiivippungalu. Paasilluarsinnaavara timmisartortitseqatigiiffik pisuunngitsoq, kisianni Air Greenlandimut oqaluttuariniarpara taama pisoqarsimanera ilisimaniassammassuk, Aviâja Kielsen Andersen Sermitsiamut oqarpoq.
Kikiassuaq Air Greenlandip Narsarsuarmit Københavnimut timmisartuussinerani ilaasunut sassaalliutit ilaanni nassaarineqartoq.
Asseq nammineq pigisaq
Pisoq ajuusaarutigigaat
Aviâja Kielsen Andersen oqaluttuarpoq angalaqatinilu angalanerminni nuannersumik misigisaqarsimallutik. Nerisassanik nutaanik sassaallerfigineqarsimavoq, nerisimanagilli oqaluttuarpoq.
- Saqisut inussiarneqaat, taamalu pisoqarsimanera ajuusaarutigingaarlugu. Taama misigisaqarsimanngisaannarlutik oqaluttuarput. Taamaakkaluartoq angalanerput nuannersuuvoq, oqarpoq.
Air Greenland suliffeqarfimmik nerisassassiornermik suliaqartumik atuivoq, taamaammallu atlantikoq qulaallugu timmisartuussinermi ilaasorpassuit nerisassaqarnissaat akisussaaffiginngilaa. Air Greenlandilli suliaq ingerlateqqinniarsimallugu oqarpoq:
- Soorunami pisimasoq nuanninngilaq, soorunamilu suliffeqarfik nerisassiornermik suliaqartoq, pisimasumi matumani frikadellinik akuutissanillu nillertunik sassaalliisoq, attaveqarfigisimavarput. Ilaasut taamatut misigisaqarnerat ajuusaarutigaarput, Air Greenlandimi piujuartitsinermut attaveqaqatigiinnermullu pisortaq Inga Dóra Markussen oqarpoq nangillunilu:
- Pisimasoq suliffeqarfimmut nerisassiornermik suliaqartumut saqqummiupparput, taakkualu nassuiaasariaqarput. Frikadellit suliffeqarfiup nerisassiornermik suliaqartup pisiniarfigisartagaanit pilersorneqarput, kikiassuarlu qanoq ililluni frikadellemiilersimanersoq suliffeqarfiup maanna misissuleruttorpaa.
Taama pisoqartarnera qaqutigoorluinnartoq, taamatullu pisoqaqqissanngilluinnarnera naatsorsuutigineqartoq, Air Greenland ilisimatitsivoq.
