Savalimmiormiut erfalasuata ulluata malunnartinneqarnerani nuimasut peqataasut

Savalimmiuni apriilip 25-at ullup erfalasoqarfiusartup malunnartinneqarnerani Nuummi Hans Egedep Illuani 100-t missaanniittunik peqataaffigineqarpoq.

Savalimmiuni peqatigiiffik Savalimmiuni naalakkersuisut suleqatigalugit nalliuttorsiornermik aaqqissuussisoq taama ilisimatitsivoq.

Savalimmiuni nunanut allanut ministeri Savalimmiunilu partiimi Tjóðveldimi siulittaasoq Sirið Stenberg qaaqqusat ilagaat. Taanna pingaarnertut oqalugiartuuvoq.

- Ulloq Merkið-ip - Savalimmiormiut erfalasuat- 1919-imi siullerpaamik amuneqarnerata, tuluillu sakkutuuinit 1940-mi apriilip 25-anni pisortatigoortumik akuerineqarnerata nalliuttorsiutigineqarnera persuarsiorfiuvoq. Taamanimiilli ulloq erfalasoqarfiusoq apriilip 25-at savalimmiormiunut nunarsuullu sinneraniittunut ulloq immikkut ittuuvoq, Savalimmiormiut Peqatigiiffiat nalliuttorsiorneq pillugu allappoq.

Sirið Stenbergip Nuummiinnerminut atatillugu Naalakkersuisut, ilaatigut nunanut allanut naalakkersuisoq Vivian Motzfeldt (S), ataatsimeeqatigai. Taassuma nalliuttorsiornermi pilluaqquai siunissamilu Savalimmiut suleqatigilluarumaarlugit neriuutigai.

Savalimmiormiut peqatigiiffiat naapertorlugu  Kommuneqarfik Sermersuumi Savalimmiormiutut innuttaassusillit inuit 159-it nalunaarsorneqarsimapput.