Savalimmiuni pisiniarfinni nioqqutissaasiviit imaqanngitsut benziinalu amigaataasoq
Savalimmiuni suliumajunnaartoqangaarpoq, tamannalu pilersuinermut sunniuteqarpoq.
Savalimmiuni sulisut suliumajunnaarput, tamannalu pissutigalugu pisiniarfinni nioqqutissaasiviit imaqanngillat orsussaaleqisoqarlunilu.
Assi: Kaj Joensen - Savalimmiormiut nutaarsiassaqartitsiviat
Savalimmiuni suliumajunnaartoqarnera sapaatip-akunneri marluk sinnerlugit sivisussuseqarsimavoq, pisiniarfissuarnilu nioqqutissat amigaataalernerannik, atuarfiit paaqqinnittarfiillu matuneqarnerannik kiisalu benziinamik dieselimillu amigaateqartoqarneranik tamanna kinguneqarpoq.
tv2.dk taama allaaserinnippoq.
Tusagassiivik naapertorlugu Savalimmiunut eqqussuineq tamarmi matuneqarsimavoq, taamaattumillu suliumajunnaartoqarnerani nioqqutissanik nutaanik Savalimmiunut tikisitsisoqassanngilaq.
Upalungaarsimasunut, politiinut ambulancenullu orsussaq immikkoorteqqaneqarpoq, eqqiaasarnerlu amigaataasoq pissutigalugu paaqqinnittarfippassuit matoqqasut, tamannalu pissutigalugu piffissami aggersumi atuarfiit matunissaat aamma ilimagineqartoq, Savalimmiuni tusagassiuutini Kringvarp Føroya-mi aaqqissuisoq John Johannesen, tv2-mut oqarpoq.
Paaqqinnittarfiit matoqqanerat angajoqqaarpassuarnut sulinerminnik isumaginnissinnaanissaannut sunniuteqarportaaq.
Suliumajunnaartut assigiinngitsorpassuarnik suliaqarput, ilaatigut aalisakkanik suliffissuarni sulisut, eqqaavissuarni sulisut umiarsualivinnilu sulisut, akissarsiallu 13-15 procentimik qaffanneqarnissaannik kissaateqarneq sulisitsisut akueriumanngilaat.
Qeqertani orsersortarfiit tamarmik orsussaarussimasut Savalimmiuni tusagassiivik local.fo pingasunngormat allaaserinnippoq. Tusagassiivik naapertorlugu illuatungeriit isumaqatigiinniarnerat sisamanngorpat aallarteqqinneqassaaq, tamannalu akerleriissutip qanittukkut aaqqiivigineqarsinnaaneranik neriuuteqalersitsivoq.
