Savalimmiuni qaammatingajak suliumajunnaartoqareersorlu suliumajunnaarneq taamaatippoq

Savalimmiuni suliaqarfinni arlalinni sulisut qaammatingajak suliumajunnaareersullu, suliumajunnaarneq taamaatippoq.

Taama Savalimmiuni umiarsualivimmi sulisut kattuffiat Havnar Arbeiðarafelag Facebookimi sapaatiummat unnukkut allappoq.

Lastbilinik ingerlatsisut, umiarsualivimmi sulisut, eqqaavilerisut, quersuarmi sulisut allallu akissarsiatik pillugit suliumajunnaartuupput.

Suliumajunnaarneq maajip 14-ianni aallartippoq.

Isumaqatigiissut nutaaq isumaqatiginninniutigineqarpoq, isumaqatiginninniarnerilli tallimanngormat unnukkut ajalusoortinneqarput.

Taama oqarpoq Eirikur Lindenskov, Sosialurinimi, Savalimmiuni aviisini annerpaami, aaqqissuisuuneq.

Maannali isumaqatigiipput.

RAL-ip umiarsuaa Thorshavnimut tikeqqissinnaanngorpoq

Savalimmiuni suliumajunnaartoqarnera pissutigalugu Royal Arctic Linep umiarsuaa Thorshavnimut tikissinnaasimanngilaq. Umiarsuaq juunip 14-iani Thorshavnimut tikissasoq naatsorsuutigineqartoq, maanna ingerlatseqatigiiffik nalunaarpoq.

Usit siusinnerusukkut Thorshavnimut nassiunneqartussaagaluit suliumajunnaarnerli pissutigalugu uninngatinnikuusat umiarsuit tulliinut ilaatinneqarumaartut, RAL ilisimatitsivoq.

Havnar Arbeiðarafelag naapertorlugu kattuffik taanna kattuffiillu allat sisamat Savalimmiuni Sulisitsisut Peqatigiiffiannik isumaqatigiissummik nutaamik atsioqatigiipput. Ukiuni marlunni atuutissaaq.

- Suliumajunnaarneq aallartimmat sulisitsisut ima neqeroorput: Ukiumi siullermi nalunaaquttap-akunneranut 4,20 koruuninik ukiullu aappaani nalunaaquttap-akunneranut 2,76 koruuninik, tassa ukiut marluk ingerlaneranni katillugit 6,96 koruuninik, kattuffik allappoq.

Taarsiullugu sulisut akissarsiaat 13 procentimik qaffanneqartut ilisimatitsissutaavoq, ukiumi siullermi nalunaaquttap-akunneranut 3,75 koruuninik ukiullu aappaani nalunaaquttap-akunneranut 3,50 koruuninik qaffanneqarlutik.

Savalimmiuni sulisut 5000-it missaat suliumajunnaarput, tassa innuttaasut 10 procentiisa missaat.

Pisiniarfinni nioqqutissat imaqannginnerisa saniatigut suliumajunnaarneq pissutigalugu meeqqeriviit matuneqarput, inuillu benzinaarunneq pissutigalugu angerlarsimaannarput.

Savalimmiuni ikummatissaaleqineq ilaatigut inuit angallannerannik eqquivoq.

Savalimmiuni umiarsualivinni sulisut kattuffiat Facebookimi allappoq: - Sapaatit-akunnerini sisamani suliumajunnaartoqareersoq Savalimmiuni pissutsit ingerlalluaqqilerput. Savalimmiuni sulisut suliumajunnaarnerat pissutigalugu inuiaqatigiit tatineqangaarput.

Suliumajunnaarneq pissutigalugu qallunaat kunngikkormiuisa pisortatigoortumik tikeraarnissaat piffissaligaanngitsumik kinguartinneqassasoq, Savalimmiuni naalakkersuisut siulittaasuat Aksel V. Johannesen aalajangerpoq.

"Pissutsit maanna atuuttut pissutigalugit tikeraarneqarnissap naleqqutinnginnera" pissutigalugu taamaaliorpoq.

Savalimmiuni naalakkersuisut juunip tallimaani Ritzauimut taama ilisimatitsipput.

Kunngi Frederik dronning Marylu nunanut avannarlernut angalanerminnut atatillugu juunip aqqaneq-aappaanit 14-iata tungaanut tikeraartussaagaluarput.

/ritzau/