Savimmik kapisisoqarneranik suliaq: Arnaq iperagaavoq

Sapaatiummat unnukkut Tasiilami najugaqarfiit ilaanni angut savimmik kapineqarpoq.

Arnaq tigusarineqarsimasoq suliamilu pasineqartoq, Kalaallit Nunaanni Politiit ataasinngormat ullaakkut ilisimatitsipput.

Arnap tigummigallarneqarnissaa siunertaralugu killisiorneqassanersoq ataasinngormat politiit aalajangerniarnikuupput.

Politiit inatsisilerituuinik isumasioqateqareernerup kingorna arnaq iperagaareersoq, pigaartut pisortaat Jørgen Madsen marlunngornermi ilisimatitsivoq.

Arnaq pinerlunnermut pisuusutut suli unnerluutigineqarpoq, pinerluffigitittorlu qanoq innersoq politiit nutaarsiassaateqanngillat.