Savimminilerinermik Ilinniarfik nutaaq Sisimiuni sananeqarnissaa pillugu borgmesteri: - Kiisami!

- Kiisami!

LÆS OGSÅ

Naalakkersuisut: Ny Jern- og Metalskole skal opføres i Sisimiut

Taama Qeqqata Kommuniani borgmesteri, Malik Berthelsen (S) Sisimiuni nutaamik Saviminilerinermik ilinniarfiliornissaq Naalakkersuisut tunngaviusumik aalajangermassuk nipaqarpoq:

-  Sisimiuni Saviminilerinermik Ilinniarfimmik nutaamik sanasoqarnissaanik Naalakkersuisut tunngaviusumik aalajangernerat soorunami assorujussuaq nuannaarutivarput! Saviminilerinermik ilinniarfimmik KTI-imut atasumik nutaamik pilersitsinissaq kommunitsinnut Sisimiunullu annertoorujussuarmik pitsaasumik sunniuteqartussaavoq. Tassami suliffiit ilinniartullu nutaat taakkualu ilaqutaat pinngitsooratik nuannersumik uagutsinnut malunnaateqartussaapput.

KTI-imi pisortaq nuannaarnissaminut utaqqigallarpoq

KTI-mi pisortap, Jokum Møllerip nutaarsiassaq pillugu qanoq qisuariarnersoq paasiniarlugu Sermitsiap attavigaa. Illalaariarluni aperivoq:

- Sorleq qisuariarnera? 1998-imi qisuariarnera?, Jokum Møller illarpoq.

Aperineqarnermini taama qisuariarnermini nassuiaatigaa Sisimiuni Saviminilerinermik ilinniarfimmik sananissaq Naalakkersuisut ukiorpassuarnili eqqartugarimmassuk. Oqallinneq 1990-kkunnili pilerpoq.  Saviminilerinermimmi Ilinniarfiup Sisimiunut nuunneqarnissaa siullermeerluni eqqartorneqanngilaq. Qinersineq kingulleq sioqqullugu pilersaarutit unitsinneqartut maanna aallartinneqaqqilerput.

Naalakkersuisut paasissutissiissutigaat suliniutip ingerlanerani neqerooruteqarnissaq pilersaarusiornissaa tullinnguutissasoq.

Naalakkersisut Sisimiuni saviminilerinermik ilinniarfimmik sananissaq tunngaviusumik pingasoriarlugu sisamariarluguluunniit aalajangernerat Jokum Møllerip eqqaamanerarpaa.

LÆS OGSÅ

Planerne om at flytte Jern- og Metalskolen sparkes igang igen

- Suli aningaasalerneqarpasinngilaq. Paasissutissanik annerusunik suli tusagaqanngilanga. Kisianni nutaarsiassani atuarpara suliniutip ingerlanerani neqerooruteqarnissaq pilersaarusiornissaa tullinguutissasorooq. Kisianni takussavarput. Aalajangeqqissimappummi, Jokum Møller oqarpoq.

Naalakkersuisut qanorpiaq pilersaaruteqarnersut paasereeruniuk talini qullarlugit nuannaarumaarpoq.

Naalakkersuisunut qujaniartoq

KTI-mi pisortap allaffianiit kilometerialunnit ungasitsigisumi borgmesteri issiavimmini issiavoq, nutaarsiassarlu isumalluarfigalugu.

-  Siunissaq ungasinnerusoq eqqarsaatigalugu isumaqarpunga Naalakkersuisut taamatut aalajangernerat silatusaarnerullunilu eqqortuusoq, tamannalu pillugu Naalakkersuisut nersualaarlugillu qutsavigaakka.

- Tassami ilinniartitanerit minnerpaamik suli ukiuni 100-ini atasussaapput. Taamaattumik ilinniarfiit imminnut assingusut kattunneqarnissaannik Naalakkersuisut aalajangernerat nunatsinnut ilinniarfeqarfinnullu pitsaanerpaasussavoq.

Naalakkersuisut naatsorsuutigaat Sisimiuni ilinniarfik nutaaq 2030-mi piareersimassasoq.

- Suliaq sivisuumik ingerlanneqartussaagaluartoq sanaartornerup aallartinneqarnissaanut nutaanillu nunaqqatitaarnissatsinnut soorunami qilanaarpugut!