Senatorip Alaskameersup Trumpip Kalaallit Nunaannik pisinissaq pillugu oqariartornera akerlilerpaa
Senator Lisa Murkowski Folketingimullu ilaasortaq Aaja Chemnitz Donald Trumpip oqariartuutaanik akerliliipput. Tamanna præsidentip sapaatip akunnerata taanerani USA-p Kalaallit Nunaannik nakkutilliilersinnaaneranik isumaqarluni oqarnerata kingorna pivoq.
USA-mi præsidenti Donald Trump sapaatip akunnerata naanerani Kalaallit Nunaannik soqutiginninnerminik erseqqissaalluni, USA-p Kalaallit Nunaannik nakkutilliilernissaanik isumarluni oqariartornerani erseqqissarneqarpoq.
Assiliisoq: Leah Millis/Reuters/Ritzau Scanpix
Donald Trumpip Kalaallit Nunaannik piserusussusaata Alaskap senatorianik republikanerimik Lisa Murkowski IA sinnerlugu folketingimut ilaasortaq peqatigalugu USA-p præsidentianik nutaamik akerliliisitsivoq.
Murkowski republikanerinut sakkortusaanngitsunut ilaavoq, arlaleriarlunilu eqqortuusorinninnermini partiiminik Trumpimillu akerliliisarpoq.
- Soorunami niuertup præsidentinngortoq (Kalaallit Nunaannik, aaqqiss.) soqutiginnippoq. Kalaallilli Nunaat niuerutigineqarsinnaanngilaq. Taama Naalakkersuisut akereerput.
Taama folketingimut ilaasortaq Aaja Chemnitz senatorilu Lisa Murkowski Issittumi inatsisartunut siulittaasoq siulittaasullu tullia oqariartorput.
Tamanna Tromsømi Arctic Frontiersip ataatsimut tusagassiuutinut nalunaarutaanni pivoq, tassani Issittumi inatsisartut Issittumi ataatsimeersuarnerup Arctic Frontiersip aallartinneqarneranut atatillugu ataatsimiinnermut atatillugu pivoq.
Trumpip Kalaallit Nunaata nakkutiginissaa upperaa
Præsidentip sapaatip akunnerata naanerani USA-p Kalaallit Nunaannik nakkutilliilersinnaaneranik isumaqarluni oqarnerata kingorna, Issittumi Inatsisartuni siulittaasoqarfiup, Aaja Chemnitzip Lisa Murkowskillu Trumpimik naqqiinerat uissuumminartuuvoq.
Chemnitzip Murkowskillu Trumpip sapaatip akuuerini kingullerni USA-p Danmarkimit Kalaallit Nunaannik pisinissaanik siunnersuuteqarnerata kingorna USA-p Kalaallit Nunaannik tigusinissaa pillugu suliassap sakkortusinerani Trumpimik unammilligassiivoq.
Kalaallit Nunaata pilerinartuunera paasinarpoq. Kalaallit Nunaammi illersornissaq, umiarsuit angalanerat allarpassuillu eqqarsaatigalugit pingaarutilimmi inissisimaffeqarpoq. Tamaanilu pinngortitami aatsitassarpassuit siunissami kikkut suliffissuarnik nakkutilliinermi siuttuunerannut nakkutiginnittuunerannullu pingaaruteqartut nassaassaapput, Issittumi Inatsisartuni siulittaasoq siulittaasullu tullia oqarput.
Peqatigiinnissamut – piginnittuunnginnissamut – kaammattuisut
Issuttumi Inatsisartut tassaapput nunani arlalinni inatsisartuni ilaasortat, Issittumi apeqqutinik piffimmilu najugaqartunik sammisaqartut.
Inatsisartut politikimut, avatangiisinut inuuniarnermilu pissutsit Issittumut sunniuteqartut oqallisigisarpaat.
- Inatsisiliortutut Kalaallit Nunaannik Danmarkimi USA-milu sinniisuusutut aqqut pitsaanerusoq takusinnaavarput. USA-p Danmarkitulli siunissap piginnittutuunngitsoq, peqatigiittulli ilusilersornissaa nassuerutigisariaqarpaa.
- Iliginnitta nukittunerpaajunissaa qularnaarniarlugu Amerikamiut Kalaallit Nunaat ilitut – pigisatuunngitsoq – isigisariaqarpaa. Tunisassaanngitsutut niueqatigiinnissamullu ammasutut, Aaja Chemnitz Lisa Murkowskilu oqarput.
Amerikap issittortaata Alaskap avannarpasissutsikkuinnaanngitsoq Kalaallit Nunaannut assingunera eqqaasitsissutigaat.
- Nuummikkuit Nomemiikkuilluunniit oqaatsit ilisarnartut takussavatit tusarlugillu, Inuit Iñupiaq-llu ataatsimut oqaluttuassartaat.
- Alaska Kalaallit Nunaanulli iluaqutissartaqarpoq, inissisimaffiup pingaarutaanit pinngortitami pisuussuterpassuarnut. Ukiuni untritilikkaani atuuttuni kingornalu peqatigiinnerunermi qitiusinnaavugut, Issittumi Inatsisartuni siulittaasoq siulittaasullu tullia oqarput.
Pituffik Space Base
Kalaallit Nunaanut oqartussaaneq allanngortinngikkaluarlugu USA-p isumannaatsuunissaanut anguniagai anguneqarsinnaasut, politikerit marluk qularutiginngilaat.
- Tamanna Pituffik Space Basemi takusinnaareerparput. Oqaloqatigiinneq suleqatigiinnerlu attaveqatigiinnitsinnik nukittunerulersitsisinnaavoq. Allartitatigut peqatiginneq iligiinnerlu tamatta ataatsimut soqatigisatsinnik aqqutissiuussisinnaavoq, Aaja Chemnitz Lisa Murkowskilu allapput.
Taakku “Issittumi Siunnersuisooqatigiit aqqutigalugit eqqissinartumik oqaloqatigiinnerup tapersersortuarnissaanut akuuffigineqarnissaanullu” kaammattuipput.
Aaja Chemnitz Lisa Murkowskillu Kunngeqarfik Danmarkip Issittumi Siunnersuisooqatigiinni siulittaasuutitaqarnissaa qilanaaralugulu taperserpaat, Kalaallillu Nunaata Siulittaasoqarfimmi pingaarutilimmik inissisimanissaa tapersersorlugu.
