Seqerngup anorersuaata qaqutigoortup arsarnerit nunarsuup silaannaani sumiiffinni arlalinni pinngortippai
Amerikamiut immap silaannaallu pissusaanik misissuisarfiata NOAA-p nalunaarutigaa seqineq annertuumik anorersuartoq - tamannalu sapaatip-akunnerata naanerani ingerlaannassasoq naatsorsuutigineqartoq.
Daillensimi Schweizimi arfininngornermi ullaavani assilisaq. Nunarsuarmi sumiiffinni arlalinni arsarnerit takuneqarsinnaasimapput, nalinginnaasumik nunarsuup avannarpasinnerusortaani taamaallaat takussaasaraluartut.
Assiliisoq: Laurent Gillieron/Ritzau Scanpix
Ukiuni qulikkaani arlalinni aatsaat taamak sakkortutigisumik seqinerput anorersuarpoq.
Tamanna pimmat nunarsuarmi sumiiffinni arlalinni arsarnernik pilersitsivoq - Tasmanienimit Tuluit Nunaanut - tamatuma saniatigut aarlerinartorsiortitsivoq ilaatigut satellitsinut aamma innaallagissamut attaveqaasersuutinut akornusersuisinnaasoq.
Taama allappoq nutaarsiassaqartitsivik AFP, USA-p Imartat Silallu Pissusaata Aqutsisoqarfianiit (NOAA) nalunaarummit tunngaveqarluni.
Arfininngornermi nalunaaqutaq 18:00 qallunaat nalunaaqutaat malillugu, Coronal Mass Ejections (CME) siulliit ilaat pivoq, NOAA nalunaarpoq.
Kingorna "Sakkortoorujussuarmik geomagnetiskimik anorersuartoq"-mik nalunaarummik qaffaasoqarpoq.
Taama nalunaaruteqarnerup kingorna, AFP naapertorlugu, tamanna pivoq Halloween-solstormit oktobarimi 2003-mi pisut kingorna aatsaat taamak sakkortutigaluni, Taamanikkut Sverigemi innaallagissamik qamittoortitsivoq aamma Afrikap Kujataani nukissiuutitigut pilersuinermut akornusersuingaatsiarluni.
Ulluni aggersuni seqineq CME'nik (Coronal Mass Ejections) amerlanerusunik aniatitsissasoq naatsorsuutigineqarpoq.
Tallimanngornermi kingusinnerusukkut unnuakkullu Europap Avannaani, Australiami Asiamilu arsarnernik assilisat amerlasuut Facebookkimi Twitterimilu saqqummiunneqarput.
AFP naapertorlugu ilaatigut nukissiorfiit aamma satellitsinik ingerlatsisut timmisartuutillillu oqartussaasunit mianersoqquneqarput, nunap assingani magnetfeltip allanngoriartornera pissutigalugu ajutooratarsinnaaneq pillugu.
Kisianni suli ajutoornernik imaluunniit ajornartorsiuteqartoqarneranik nalunaaruteqartoqanngilaq.
Videnskab.dk siusinnerusukkut seqernup qinngornerani anorersuarnerit seqernup qulaani atmosfærimi annertuunik magnetiseret plasmamik aniatitsisarneritut allaaserineqarput. Tamakku nalinginnaasumik qalasersuup nalaani imaluunniit sikuijuitsumi kujallermi arsarnertut takuneqarsinnaasarput.
Arsarnerit Danmarkimi ukiumut marlussoriaannarluni nalinginnaasumik takuneqarsinnaasarput.
Danmarkimi taamaattoqarnera qaqutigoortuusarpoq, kisianni ullut tamaasa issittumi sumiiffinni pivoq. Tassa imaappoq Nordskandinaviami, Islandimi aamma Kalaallit Nunaanni arsarnerit ulluinnarsiutaasarput.
/ritzau/
