Siorna
filipinerit arnat pingasut, SIK aqqutigalugu sulisitsisuminnik RS Servicesimik
ilaatigut ukiuni arlalinni amiilaarnartumik akilernerluinerat pillugu
eqqartuussivimmut tunniussinerat AG-p ukiup ilivitsup matuma allaaseraa.
435.000
kr-nik taarsiivigeqqullutik piumasaqarput.
Siorna
filipinerit arnat pingasut, SIK aqqutigalugu sulisitsisuminnik RS Servicesimik
ilaatigut ukiuni arlalinni amiilaarnartumik akilernerluinerat pillugu
eqqartuussivimmut tunniussinerat AG-p ukiup ilivitsup matuma allaaseraa.
SIK naapertorlugu kukkussutaasartut amigaataasartullu:
• Tunngavissaqanngitsumik
soraarsitsinerit
• Kukkusumik
akissarsiaqartitsinerit
• Qaangiuttoornermi
tapeqartitsinnginneq kukkusumilluunniit qaangiuttoornermi akissaateqartitsineq
•
Soraarnerussutisiassanut akiliisannginnerit sulisitsisulluunniit kukkusunik
soraarnerussutisiassanut akiliuteqartarneri
• Feeriartarnermut
inatsisip malittarisassaanik ataqqinninnginnerit, taamaaliornermi sulisut
feeriarnissamut pisinnaatitaaffigisaminnik feeriartinneqartannginnerat
• Qasuersaarnissamut
malittarisassat, sapaatillu akunnerani minnerpaamik ulloq unnuarlu ataaseq
qasuersaarnissamut piumasaqaatit ataqqineqarneq ajorneri. Sulisut qaammatit
arlallit ataannartumik sapaatip akunneranut ulluni arfineq marlunni tamani
sulisinneqartarnerat SIK-p nalaattarpaa
• Ininik
mikisunik akiliisitsilluni attartugassaqartitsineq, attartornermut
assigisaanilluuniit attartukkaminnut atatillugu sunik
pisinnaatitaaffeqarnerannik nassuiaasunik isumaqatigiissuteqartannginneq
435.000
kr-nik taarsiivigeqqullutik piumasaqarput.
Suliaq Kalaallit Nunaanni
Eqqartuussivimmi suliarineqarpoq, SIK-llu piumasaqaatai akuerineqarput.
Kingorna suliffeqarfik akiliisinnaajunnaarpoq, suliarlu ukiaru inaarneqassasoq
SIK-mi allaffeqarfimmi pisortap Bjarne Petersenip nalilerpaa.
- Suliaq
sivisuumik ingerlanneqarpoq, ajoraluartumilli suliffeqarfik
akiliisinnaajunaarpoq, akiliisinnaajunnaarnermili suliami aningaasanik
pissarisassaqarneranik takussutissaqarluarpoq, taamaalilluni arnat pingasut
taarsiivigineqarsinnaallutilluunniit pissarisamik annertunerpaartaannik
pisinnaallutik, Bjarne Petersen oqaluttuarpoq.
Iluanaarutit
Eqqartuussivimmi
aalajangiineq suliffeqarnermi sunniuteqaatissatut kissaatigisatut
sunniuteqanngilaq, SIK-mi naapertorlugu sulisitsisut arlallit suli sulisartunut
atorfinitsinneqarnerminni isumaqatigiissutaanni isumaqatigiissutinik
pisinnaatitaaffinnillu unioqqutitsisarput.
AG-lli
siorna allaaserisaata SIK-p ilaasortanit amerlasuunit ikiorneqarnissamik
kissaateqartunit saaffigineqarneranik kinguneqarpoq.
- Saaffiginnissutit
aallaavigalugit ajoraluartumik nunatsinni suliffeqarfiit arlallit nunanit
allanit sulisartunik aaqqissuussamik suli atornerluisartut SIK naliliivoq. Tamatumani ilaatigut sulisartut Filipinerineersut Thailandimeersullu ilaapput.
Tamanna inuiaqatigiittut attassinnaanngilarput, uagullu inuiaqatigiittut
iliuuseqannginnerput eqqortuusinnaanngilaq. Nunanit allamiunik atornerluinikkut
suliffeqarfinnit piginnittut nunanit allanit sulisartuminnit,
sulisussaaleqinerput pissutigalugu maannartunit, annertuumik
iluanaaruteqartarnerat iliuusituaavoq, Bjarne Petersen oqarpoq.
Kulturi
SIK
ilaatigut tunngavissaqanngitsunik soraarsitsinernik, kukkusumik
akissarsiaqartitsinernik, qaangiuttoornermi sapaatinilu
akilerneqartannginnernik, soraarnerussutisiassanut akiliisannginnernik kiisalu
feeriartarnermut tunngasunik saaffigineqartartoq taassuma nassuiaatigaa:
Nunatsinni nalinginnaasumik atugassarititaasut:
Sulisartut
avataaneersut minnerpaamik nunatsinni aningaasarsianik atorfeqarnermilu
atugassarititanik, Kalaallit Nunaanni Sulisitsisut SIK-llu sullissinermik
inuussutissarsiortunut isumaqatigiissutaannut naapertuuttunik
isumaqatigiissuteqarfigineqartarnissaannik SIK isumaqarpoq. Taamatuttaaq
atorfinitsinneqarnermi isumaqatigiissutini pineqartut atorfimmut atatillugu
sulisunut inissiamik ineqarnerannik allassimasoqartarnissaa SIK-p kissaatigaa.
Tamatuma saniatigut sulisut atorfinikkiartornermi suliunnaarnermilu angerlamut
uternerminni akiliunneqarlutik angalanissamut pisinnaatitaaffeqarnerisa
atorfinitsitsinermi isumaqatigiissutini allassimanissaa SIK-p aamma kissaatigaa.
Ilinniarsimanngitsunut
aningaasarsiaasa minnerpaaffiat apriilip aallaqqaataa aallarnerfigalugu nalunaaquttap
akunneranut 103,06 kr-iuvoq, ilinniarsimasunullu 120,91 kr-iulluni, tamatuma
saniatigut qaangiuttoornermi, sapaatini nalliuttunilu tunngaviusumik
aningaasarsiat 50 procentiattut annertussusilimmik tapeqarpoq.
- Sulisartut
kulturiluunniit kangianeersoq matumani pivarput, taakku feeriartarnermut
inatsimmik soraarnerussutisiassanulluunniit aaqqissuussinernik
ilisimasaqanngillat. Sulisitsisup pitsaasup soorunami sulisuni sapaatit
akunnerini sorlerni feeriarusunnerannik aperisarpai. Feeriarsinnaanermulli
pisinnaatitaaffiit ilisimaarinngikkaanni, kissaatillu apeqqutigineqartanngippata,
taava SIK-p sulisartut qaammaterpassuarni, ilami ukiorpassuarni feeriartarnatik
sulisarnerat misigisarpaa.
Bjarne
Petersenillu atorfinitsitsinermi isumaqatigiissutit amigaateqartarnerat kiisalu
attartornermut isumaqatigiissuteqartannginneq siumortarpai:
- Amerlasuuni
sulisitsisoq akiliisitsilluni ineqartitsisarpoq. Amerlasuut inissiani mikisuni
najugaqatigiittarput, namminerlu inuuneqarnissaq ajornakusoortarpoq.
Inuiaqatigiit
ajornartorsiutaat
SIK
maannakkut niuertarfinnut sullissisunullu arfinilinnut sulianik ingerlatsisoq
Bjarne Petersenip oqaluttuaraa. Suliat sisamat tallimalluunniit ima
ajortigisut, allaat eqqartuussivimmut anngunneqarsinnaallutik, taanna
naliliivoq. Suliat ilaani sulisut marluk ilaatigut tunngavissaqanngitsumik
soraarsinneqarnerat qaangiuttoornersiutisisannginnerallu pillugit 345.000
kr-nik taarsiivigineqarnissamut tunngavoq.
- Aallaqqaammut
suliffeqarfimmik piginnittoq oqaloqatiginiaqqaartarparput,
angusaqarfiunngikkaangallu suliat aalajangiivigitinniarlugit eqqartuussivimmut
ingerlatittariaqartarpagut. Sulisut sulinermi atugarisatik pillugit
kattuffimminnut saaffiginninnissamut sapiaatsut matumani pivagut.
Ajoraluartumilli saaffiginninnerit taakku suliassarpassuusinnaagaluartut
ilaminiinnannguarigai pasinarpoq.
Taasumali
suliffeqarfiit nunanit allaneersunit sulisoqartut tamarmik, sulisartunik
nunanit allaneersunit sakkortuumik atornerluisannginnerat erseqqissaatigaa.
- Ajoraluartumilli
tamanna ima siaruaassimatigaaq allaat SIK-p naliliinera malillugu tamanna
inuiaqatigiinni ajornartorsiutitut isigineqartariaqarluni. Taamaammallu
oqartussat ilaatigut suliffeqarfinnik nunanit allamiunik sulisoqartunik
amerlanernik nakkutilliiartortarnertigut pissutsinik iliuuseqarnissaat
neriuutigaara, taamaalillutillu suliffeqarfiit sorliit fast-trackimik
aaqqissuussinermut ukiualuit matuma siorna eqqunneqartumut ilaanissaat
isorinnittumik aallaaveqartumik nalilerlugu.
Arnat pingasut:
Arnat
pingasut allaaserisami sammineqartut kingorna tamarmik Kalaallit Nunaanni
suliffeqarfinni allani suliffissarsipput.
AG-p
filipinerit arnat pingasut sulinerminni inuunerminnilu atugaat siorna allaaserimmagit
politikerit arlallit sulisartut nunani allamiut atugaannik pitsanngorsaanernik
iliuuseqartariaqarneranik oqariartuuteqarput. Oqaatsitik pimoorukkaat SIK-p
qularinngilaa, peqatigisaanillu nunani allamiut sulisartut atugaasa
pitsanngoriarsimannginnerat takusinnaavarput. Taamaammat iliuuseqarnissamut
piffissanngorpoq.
- Suliani
ataasiakkaani ikiuuttarnerup saniatigut SIK-p maani nunatsinni nunani allamiut
pisinnaatitaaffiinik paasissutissiineq ilaatigut video-t quppersakkallu
tuluttuut atorlugit siuarsarniarpaa. Taamatuttaaq soqutiginnittut tamaasa Nuumi
suliffeqarnermi inatsisinik pisinnaatitaaffinnillu paasititsiniaanermut aggustimi
qaaqqunissaannut pilersaaruteqarpugut, Bjarne Petersen oqarpoq.
