Nuummi umiarsualivik ingerlalluartoq Namminersorlutik Oqartussat umiarsualiviutaata Sikuki Nuuk Harbourip ukiumoortumik nalunaarusiaani takuneqarsinnaavoq.
Assersuutigalugu umiarsuarnut takornariartaatinut ilaasut 2023-miit 2024-mut 48 procentimik amerleriarsimapput, taamatuttaarlu umiarsuit Atlantiku ikaarlugu ingerlasartut umiarsuillu assartuutit tulattartut amerleriarsimapput.
Nuummi umiarsualivik ingerlalluartoq Namminersorlutik Oqartussat umiarsualiviutaata Sikuki Nuuk Harbourip ukiumoortumik nalunaarusiaani takuneqarsinnaavoq.
Assersuutigalugu umiarsuarnut takornariartaatinut ilaasut 2023-miit 2024-mut 48 procentimik amerleriarsimapput, taamatuttaarlu umiarsuit Atlantiku ikaarlugu ingerlasartut umiarsuillu assartuutit tulattartut amerleriarsimapput.
Ingerlatseqatigiiffik 2024-mi akileraarutit suli ilanngaatiginagit 23,3 million koruuninik akileraarutillu ilanngaatigereerlugit 17,4 million koruuninik aningaasaqarnikkut sinneqartooruteqarpoq.
Tamanna 2023-mut sanilliullugu qaffariarneruvoq, taamanikkut akileraarutit suli ilanngaatiginagit 18,3 million koruuninik sinneqartooruteqarsimammat.
Kaaviiaartitat aamma 2023-mi 71 million koruuniniit 2024-mi 74 million koruuninut qaffariarput, siulersuisullu angusat naammagisimaarpaat.
Ukiumoortumik nalunaarusiami kisitsisit pingaarnerit.
Takussutissiaq: Nuuk Sikuki Harbour A/S
Ukioq manna angusat ilaatigut umiarsuarnik takornariartaatinik angallassinerit ilimagisamit amerlanerunerat pissutigalugu naatsorsuutigineqartumit pitsaanerusut aqutsisut nalunaarusiaanni allassimavoq.
Aammattaaq containereqarfimmik alliliinissamik suliariumannittussarsiuussinerup taamaatiinnarneqarnera pissutaavoq.
Mittarfissap nutaap ammarneqarnerata kingorna umiarsualiviup ulapputigineqarnera annertusisoq
Sikuki Nuuk Harbour tusagassiuutinut nalunaarummi allappoq ukioq manna suliat takutikkaat Nuummi umiarsualiviup attaveqaataasa atugaat artornarsiartuinnartut.
- Aalisarnikkut inuussutissarsiorneq, umiarsuit takornariartaatit tikittartut amerlipiloornerat aammalu nunat tamalaat akornanni mittarfissap Nuummiittup ammarnera, taakku ataatsimoorlutik umiarsualiviup suliaqarsinnaassusaanut artukkiinerulersimapput. Taamaattoqarneranilu allilerinissaq umiarsualiviullu atortulersuutimigut nutarsaasariaqarnera pisariaqartinneqartut uppernarsarneqarpoq, Sikuki Nuuk Harbourimit, pisortamit John Rasmussenimit siuttuuffigineqartumit, nalunaarummi allassimavoq.
Umiarsualiviup allilerneqarnissaanut siullermik suliariumannittussarsiuunneqarnerata taamaatinneqarnerata kingorna, tunaartalimmik suliniutip aaqqissugaanera eqqarsaatigeqqillugu suliariumannittussarsiuuteqqinnissaalu siunertaralugu massakkut Sikuki sulissuteqarpoq. Tamatumunnga ilutigitillugu atortulersuutinik nutaaliaasunik, Nuummi umiarsuit takornariartaatit ilaasuminnik paarlaassineranni atorneqartartunik, ineriartortitsineq aallartinneqarpoq, ingerlatseqatigiiffik allappoq.
Sikuki Nuuk Harbourip Nuummi umiarsualiviup saniatigut aamma Kangerlussuarmi umiarsualivik ingerlappaa. Taakkunani suliat pillugit kisitsisit uani takuneqarsinnaapput:
Takussutissiaq. Sikuki Nuuk Harbour
Alliliinissaq suliarinnittussarsiuteqqinneqassasoq
2025-mi aningaasaqarnikkut angusat 2024-mit qaffasinnerulaarnissaat naatsorsuutigineqartoq, ingerlatseqatigiiffiullu 2025-mi uku anguniagarissagai ukiumoortumik nalunaarusiami allassimavoq:
• Qeqertaq Avannarlermi umiarsualiviup allilerneqarnissaa ukiup qiteqqunnerani neqeroorutigineqaqqissaaq.
• Nuummi umiarsuarnut takornariartaatinut ilaasunut nutaamik sullisseriuseqalissaaq.
• Kangerlussuarmi umiarsuit aqqutaannik saliineq 2025-mi naammassineqassaaq.
• Kangerlussuarmi umiarsualivimmi nutaamik orsersortarfiliornissaq aallartinneqassaaq.
• Nuummi Kangerlussuarmilu puttasut inissorneqarneri naammassineqassapput.
• Piujuartitsineq aamma ESG pillugit nalunaarusiorneq ukkatarineqarnerussapput.
