Sineriak 2000 kvadratkilometerisut annertutigisoq qaammataasatigut nunap assiliorneqartoq
Imaatigut angallanneq isumannaannerulersinniarlugu Kitaata Tunullu sineriaa nunap assiliorneqarput.
Geodatastyrelsip qaammataasaq atorlugu Nuup Maniitsullu akornanni sineriak aamma Tasiilap Ittoqqortoormiillu sineriaa 22.000 kvadratkilometerisut isorartutigisoq nunap assiliorpaa.
Assi: Geodatastyrelsen
Geodatastyrelsip piareersaatitut suliniummut nutaamut atatillugu Kalaallit Nunaata sineriaata qanittuani imartat 22.000 kvadratkilometerisut annertutigisoq immap assiliorpaa. Nuup Maniitsullu akornanni, Tasiilap Ittoqqortoormiillu eqqaanniittut assiliortoqarnerarput.
Paasissutissat tamarmik saqqummiisarfimmi NunaGIS-imi takuneqarsinnaalereerput.
Geodatastyrelsen tusagassiutinut nalunaarummi allappoq.
Immap assiliornermi imaani angallannerup isumannaallisarneqarnissaa, annaassiniarnissamut upalungaarsimanerup aamma imarsiornermi atortulersuuteqarnerup pitsanngorsarnissaa siunertaavoq.
Paasissutissat piareersaateqarluni suliniummeeraluartut, immallu assiginut pisortatigoortunut ilaanngutinngikkaluartut, sumiissusersiornissamullu naatsorsuutaanngikkaluartut sumiiffinni siusinnerusukkut paasissutissanik naammanngitsunik pisoqalisimasunilluunniit ilisimasaqarnerulersitseqataapput.
- Piareersaasiorluni suliniummi matumuuna, Kalaallit Nunaanni sinerissap qanittuani imaani angalasunut isumannaallisaaneq annertusarniarlugu pingaarutilimmik alloriarpugut. Immap assiliornerup najukkami atuisut paasissutissanik, siornatigut pineqarsinnaanngitsunik tunivai, peqatigitillugulu suleqqinnissami pingaarutilimmik tunngavissiilluni, Geodatastyrelsimi siunnersortaaneq Christian Thellufsen oqarpoq.
Geodatastyrelsi suliffeqarferujussuit, soorlu Garmin aamma Navionics suleqatigilernissaat pilersinniarlugu, taamaalilluni paasissutissat siunissami atortorissaarutinut, imaani angalasorpassuit ulluinnarni atugarisaannut atalersinnissaat aamma anguniarlugu suliaqarpoq. Piffissaq ungasinnerusoq eqqarsaatigalugu suliniummi qaammataasat atorlugit Issittumi sinerissap qanittuani nunap assiliornermi, nunat tamalaat akornanni qaffasissutsit pillugit ineriartortitsinermi peqataanissaq naatsorsuutigineqarpoq.
Asiaq suleqatigineqartoq
Piareersaateqarluni suliniut 2023-imi aallartinneqarpoq. Issittumi umiarsuit atorlugit angallannerup annertusiartornera pissutaavoq. Kalaallit Nunaanni sinerissap qanittuani sumiiffinni amerlasuuni manna tikillugu immap assiliorneqanngillat, tamannalu pissutaalluni isumannaatsumik sumiissusersiornissaq unammillernartuulluni.
Qaammataasaq atorlugu ikkattut tiniguttartut sumiissusersinissaat, sineriak ersarissisillugit navialiffiusinnaasullu sumiissusersineqarsinnaasut piareersaateqarluni suliniummit paasineqarpoq.
Asiaq qanimut suleqatigineqarpoq, NunaGIS-ip saqqummiisarfiatigut - aamma Geodatastyrelsip nittartagaatigut - tamanut atugassiarineqarnissaat siunertaralugu, taamaalilluni Kalaallit Nunaanni nunap assigi aamma geodata, oqartussaasunit, suliffeqarfinnit innuttaasunillu ajornanngitsumik atorneqarsinnaalersillugit.
- Asiami nuannaarutigisorujussuuarput Geodatastyrelsimik suleqateqarnerput aamma NunaGIS-imi paasissutissat nutaat Kalaallit Nunaanni ajornanngitsumik takuneqarsinnaalernissaannut peqataasinnaanerput pillugu.
- Ikkarluit ilisimassallugit imaani angalatilluni isumannaallisaanermut pingaarutilerujussuuvoq, nunamilu isorartoqisumi pingaaruteqarpoq qaammataasat atorlugit teknologiip periarfissarititaanik misilittaanissarput iluaquteqarniarnissarpullu. Tamatumunnga Geodatastyrelsip suliniutaa assersuutissaalluarpoq, Asiami pisortaq Mette Skarregaard Pedersen oqarpoq.
Piareersaasiorluni suliniummi angusat nunap assiliornermi ilisimatusarnissamut periaatsinillu nutaanik ineriartortitsinissamut patajaatsumik tunngavissiipput. Najukkami atuisut nunallu tamalaat akornanni suliaqartut qaninnerusumik suleqatigiilernissaannut siunissami imaani angalanerup isumannaannerulersinniarneqarnera aamma periarfissanngorpoq.
