Siornatigut taaguunneqarluartoq Siumumit tunuarpoq
Siumut Nuummi siulittaasoq Qarsoq Høegh-Dam partiimi ilaasortaajunnaarpoq.
Qarsoq Høegh-Dam Siumumi ilaasortaajunnaarpoq. Jørgen Wæver Johansen siulittaasunngorpoq.
Jensine Berthelsen
Qarsoq Høegh-Dam 2021-mi qinersinermi 796-init taaneqarpoq, Siumup qinigassanngortitaasa akornanni taaneqarnerpaat ilaattut inissilluni taaneqarnerpaat sisamaattut inissilluni.
Qarsoq Høegh-Damili Inatsisartunut ilaasortanngunngilaq, Inatsisartuni ataatsimiittoqannginnera sioqqullugu tunuarami. 2015-imi hashimik tigummiaqarsimasutut akiligassinneqarsimanera paasinarsimmat tamanna pivoq.
Kingorna Siumut Nuup immikkoortortaqarfiani siulittaasunngorpoq, maannali partiimi ilaasortaajunnaarpoq.
Facebookimi taama ilisimatitsivoq.
Siumup periaasia akueriuminaatsikkamiuk taama aalajangersimalluni, politikkeri allatamini ilisimatitsivoq.
Siornatigut politikkeri nuimasuusimasoq siulittaasunngorpoq
Aalisarnermut inatsit pillugu isumaqatigiinnginneq pissutaanersoq aperineqarami ima akivoq:
- Ataatsimut isigalugu taama aalajangerpunga. Aalisarnermut inatsit peqqutaaqataavoq.
Qarsoq Høegh-Dam nangilluni oqarpoq maannamut partiimut allamut ilaasortanngornissani eqqarsaatiginngikkini, erseqqissarpaali:
- Politikkip silarsuaa qimannavianngilara.
Borgmesteriusimasoq politikkerilu nuimasoq Jørgen Wæver Johansen Siumut Nuummi siulittaasunngortoq, Qarsoq Høgh-Dam ilisimatitsivoq.
Aalisarnermut inatsip eqqissiviilliortitsineranut atatillugu Siumut ilaasortanik arlalinnik annaasaqarsimavoq. Aalisarnermut naalakkersuisuusimasup Siumumilu politikkerip nuimasup Karl Kristian Krusep aamma tunuarsimanini Sermitsiamut uppernarsarpaa. Tunuarnini oqaaseqarfiginerorusunngilaa.
