SISA milliardit affaat sinnerlugit aningaasaliissuteqartarnikkut angusaqarpoq

Ukiup affaa siulleq sullitanut amerlasuunut SISA-mi soraarnerussutisiaqalernissamut aningaasaateqarfimmik atuisunut naammaginartumik ingerlasimavoq.

Taamaasilluni soraarnerussutisiassanut aningaasaateqarfik, Kalaallit Nunaanni annerpaaq, soraarnerussutisiassanut akileraarutit suli ilanngaatiginagit 525,7 millionit koruuninik aningaasaliissuteqartarnikkut angusaqarpoq.

Tamanna siorna piffissamut tassunga sanilliullugu 175 millionit koruunit missaannik annertuneruvoq. 2024-mi ukiup affaani siullermi soraarnerussutisiaqalernissamut akileraarutit 79,9 millionit koruuniupput, siorna 48,2 millionit koruuniullutik.

Taama SISA ukiup affaanut nalunaarusiami allappoq, aningaasaliissuteqarnerlu naammaginartutut tassani aqutsisut oqaatigisimavaat.

Soraarnerussutisiaqalernissamut aningaasaateqarfiup niuerfimmi aningasaliissuteqartarnissaminut aningaasaateqarfiisa marluusut piffissami angusaasa procentiat imaappoq; Annertusiartortitsineq aamma Aalaakkaasoq taakkua imatut inissipput 10,38 procent aamma 4,28 procent.

Præsidentimut qinersineq sorsunnerlu nalorninartorsiortitsipput

Taamaattorli aningaasaliissuteqartarnermut niuerfinnit pissutsit suli annertuumik nalorninartoqartut, ukiup affaanut nalunaarusiami SISA naqissusiivoq. Ukiup sinneranut naatsorsuutit pillugit soraarnerussutisiaqalernissamut aningaasaateqarfik ima naliliivoq:

- Piffissaq ungasinnerusoq eqqarsaatigalugu aningaasaliissutigineqartut pitsaasumik iluanaaruteqarfiussapput, kisianni piffissaq qaninnerusoq siumut takorloorneqarsinnaanngilaq.

- Politikikkut pisut arlalippassuit qularuteqarnissamut pissutissaqartitsipput, tamakkua kingunerisinnaallugu nalit (kurs) apparsinnaanerat: USA præsidentimik qinersineq, Frankrigimi politikikkut pissutsit maannakkorpiaq parlamentimut qinersisoqarnerata kinguninnguani ersernerluppoq, Ukrainemi sorsunneq suli ingerlavoq taamatuttaaq Israelip aamma Hamasip akornanni aaqqiagiinnginneq ingerlaannarpoq aammattaaq Kinap aamma Nunat killiit akornanni pissanganartoqarpoq, SISA allappoq.

Ukiup affaani siullermi SISA-mi ilaasortat 197 millionit koruuninik akiliuteqarsimapput, soraarnerussutisianullu 64,8 millionit koruunit tunniunneqarsimapput. Soraarnerussutisiassanut aningaasaateqarfik maannakkut 5,7 milliardit koruunit missaannik aningaasanik aqutsisuuvoq.

SISA 41.000-t missaanni ilaasortaqarpoq, taakkunannga 20.000-t ilaasortaanermut akiliuteqartartuullutik.