Sisimiuni 2030-mi saviminilerinermik ilinniarfittaaq

1995-mut utertariaqarpugut, taamani Saviminilerinermik ilinniarfiup Nuummit Sisimiunut nuunneqarnissaa isumassarsiarineqaqqaarmalli. 

Ullumikkut 2025-imiippugut. Maanna ilinniartitaanermut Naalakkersuisoq, Nivi Olsenip (D) Inatsisartuni ilaasortamut, Erik Jensenimut (S) akissuteqarnermini Saviminerinermik ilinniarfimmut tunngatillugu qanoq pisoqarnissaa pillugu paasissutissat erseqqarissut saqqummiuppai.

Ilinniarfiup illorsuassaa nutaaq, 8.800 m2 missiliorlugu angissusilik, siunissami saviminilerinermik ilinniartut ilinniariartortarfigiligassaat, Sisimiunilu taanna inissisimassaaq.

2030-imi naammassineqarnissaa naatsorsuutigineqarpoq

Naalakkersuisut paasissutissiipput sanaartorneq 2027-imi aasakkut aallartinneqarnissaa naatsorsuutigineqartoq, 2030-imilu ilinniarfiup naammassineqarnissaa naatsorsuutigineqarluni.

- Sanaartorneq nutaaq saviminilerinermi ilinniarfimmi ininik nutaalianik ullutsinnullu naleqquttunik tapersersuissaaq. Tamatuma saniatigut init ataatsimoorfiusinnaasut, soorlu nerisarfik uninngaarfissallu, KTI campusimut takorluukkanut naapertuuttut pilersinneqassapput, Nivi Olsen oqarpoq.

Taamaattorli aallartinnginnermi tamakkiisumik siunnersorti nassaarineqartariaqarpoq, tassungalu tunngatillugu neqerooruteqartitsineq aallartinneqareertoq, ilinniartitaanermut Naalakkersuisoq Nivi Olsen (D) paasissutissiivoq, kisianni Saviminilerinermut ilinniarfittaassamut aningaasat suli immikkoortinneqanngitsut ilanngullugu Naalakkersuisoq ilisimatitsivoq:

- Sanaartugassanut missingersuutinik suli suliarinnittoqarnikuunngilaq. Kvadratmeterimut akit 35.000-45.000 kr.-t akornanniinnissaat naatsorsuutigalugu sanaartornermut akit katillugit 352 mio. kr.-t missaanik annertussuseqassasut missiliutigineqarsinnaavoq.