Sisimiuni Aatsitassarsiornermik Ilinniarfik aserorteriffigineqaqattaartoq

Sisimiuni Aatsitassarsiornermik Ilinniarfik aserorteriffigineqaqattaarpoq, paasinarsivorlu meeqqat ukiukitsut aserorterisuusut.

Meeqqat ukiukitsut piliaannik ilinniarfik sanaartortunik ilinniartoqartoq ilinniarnermut atugassaminnik annaasaqarpoq.

Ilinniarfiup sungiusartarfiani sanaartortunut maskiinat arlallit juunip ulluisa 14-anni aserorteriffigineqangaatsiarput. Tamatuma kinguneraa maskiinat sisamat ilinniartut misilitsinneranut atugassaraluit ulloq taanna atorneqarsinnaajunnaarnerannik.

Ullualuit qaangiuttut, juunip ulluisa 17-anni maskinat aserorteriffigineqaqqipput. Taama Kalaallit Nunaanni Politiit tusagassiuutitigut nalunaarummi ilisimatitsipput.

Aserorteriffigineqartut 60.000 koruunit missaanni naleqartut

Aserorteriffigineqartut 60.000 koruunit missaanik naleqassangatinneqarput, aningaasallit tamakkiisut suli naliliiffigineqanngillat.

- Pinerlunnerit taamaattut najukkatsinni ajornartorsiutaapput, inuiaqatigiinnullu aamma Aatsitassarsiornermik Ilinniarfimmut ilinniartunullu ataasiakkaanut sunniuteqarlutik. Politiit sapinngisartik tamaat aserorterinerit paasiniarlugit iliuuseqartarput, aamma aserorterisutut pasineqartut, ukiukitsuusut nassaarineqareerput, Sisimiuni politiini politikommissær Karl Jørgen Lennert oqarpoq.

Politiit sumiiffimmi suli nakkutilliipput.