Sisimiuni isertitsivimmi pissutsit matoqqasutut ittut

Angut inuusuttoq juunip ulluisa 21-at aallarnerfigalugu politiinit tigummigallarneqalerpoq. Isertitsiviimmiinnermini atugai ajorluinnartuusut, illersuisua isumaqarpoq. Atugaalu pillugit oqartussaasuniit akineqarnissani sorsuutigaa.

Sisimiuni isertitsivik sanaartorfigineqaleruttorpoq, tamatuma kingunerisaanik isertitsivimmi igalaat asserlugit matoqqatinneqarput, sanaartortoqarmallu nipiliortoqarluni.

Illersuisup Christina Johnsenip illersukkami isertitsivimmiinnermini atugai naammaginanngitsut maluginiarpai. Isumaqarlunilu pinerluuteqarsimasunut inissiisarfiit tigummigallarneqartunut atorneqartartut nalinginnaasut assiginagit inissinneqarsimasoq, tamannalu ernumanartuusoq.

Tamanna tunngavigalugu illersuisoq illersukkami allamut nuunneqarnissaanut iliuuseqartoqarnersoq unnerluussisussaatitaasunut politiinullu paasiniaavoq.  Tamanna juunip ulluisa 25-anni pivoq.

- Maluginiarpara sullitara pissutsini inuppalaanngitsumik atugaqartitaasoq, politeeqarfik iluarsaanneqarluni sanaartorfigineqarpoq, igalaallu assersorneqarlutik matuneqarsimallutik.

Christina Johnsenip unnerluussisussaatitaasunut politiinullu allagai Sermitsiap pissarsiai naapertorlugit, pineqaatissinneqarsimasunut inissiisarfimmi tigummigallarneqartunut nalinginnaasumik atugassarititaasut isertitsivimmi atugaanngillat.

- Qaqugu qanorlu sullitara nuunneqarnissaanik suliniuteqartoqarnersoq piaartumik inussiarnersumillu paasisinnaavara?

Akineqanngilarli.

Fem mails, der aldrig blev besvaret

Allakkani akineqarneq ajormata unnerluussisussaatitaasunut politiinullu naammagittaalliuuteqarpoq:

- Juunip ulluisa 25-ani, 28-ani, juulip ulluisa pingajuanni, juulip aqqarngani aammalu juulip aqqaneq aappaanni politiinut unnerluussisussaatitaasunullu saaffiginnissuteqarpunga, tassani paasiniarlugu sullitara sumiinnersoq qanorlu attavigisinnaanerlugu. Piffissani taakkunani akineqanngilanga, Christina Johnsen allappoq.

Politiit tigummigallarneqartut politiini isertitsivimmiinnissamut pillugit nalunaarummi allassimavoq tigummigallarneqartoq tigusaaneranit nalinginnaasumik ullup ataatsip iluani pineqaatissinneqarsimasunut inissiisarfimmut inissinneqartartussaasut. Illersuisuatali paasivaa illersukkani suli isertitsivimmiittoq:

- Juulip ulluisa aqqaneq-aappaanni eqqartuussivimmi ilisimannittunik apersuinermik suliaqarlunga aatsaat paasivara illersugara suli Sisimiuni isertitsivimmiitinneqartoq.

- Eqqartuussivimmeereerlunga politeeqarfiliarpunga, tassani kiisami illersugara naapippara. Paasitippaanga arlaleriarluni attavigiumasimagaluarlunga, kisiannili kissaataa malinneqarsimanani.

Matoqqasutut ittunik atugassaqartitaaneq

Christina Johnsenip sullitani alakkaramiuk, sullitami isertitsivimmi inaa takusinnaasimavaa:

- Isertitsivimmi atugai takugakkit maluginiarpara nalunaarummi atugassarititaasunut piumasaqaatit malinneqanngitsut. Illersugara issiaveqanngilaq, nerriveqanngilaq, ataatsimoortarfimmi TV peerneqarsimavoq. Aamma oqaatigaa ullormut silaannarissartitaasarani.

- Taassuma saniatigut maluginiarpara illersukkama tigummigallarneqarneranut pissutsit matoqqasutut ittut, piffissap annerpaartaani ineeqqamini mattussaaqqasarpoq, silap qaamaneranik takussanani. Paasiniarusuppara retsplejelovimi §373 ilisimateqqaarnanga atuutsinneqalersimanersoq, eqqartuussivimmi allassimasumi mattussaaqqanissaa eqqaaneqanngimmat.

- Ajortorujussuuvoq...

Tigummigallarneqartoq Sermitsiap Sisimiuni immikkoortortaqarfiata alakkarnissaanut akuerisaavoq, pulaarnerlu pingasunngornermi juulip 17-ani pivoq.

Angut inuusuttoq politiimit ilagineqarluni allaffiliartinneqarpoq. Angut iteqqaannivoq. Oqaluttuaraa sapinngisamik sininniaannaavissimalluni, ulloq anigorniarlugu.

- Ajortorujussuuvoq. Naluara qanoq oqaatigissanerlugu, siullermik artornartorujussuuvoq ingammik aneriaannaanani, uffariaannaanani, kiserliornartorujussuuvoq. Igalaat asseqqaneqarput sanaartortoqarnera peqqutaalluni, nipitoorujussuullutillu.

- Sininniaannaavippunga sapinngisannik, ulloq qaangiutipallanniassammat. Immaqa sapaatip akunneranut marloriarlunga silaannarissartinneqarpunga. 

Isertitsivimmiitinneqartut ullormut ataasiarlutik minnerpaamik nalunaaquttap akunnerani ataatsimi silami silaannarissarsinnaatitaasut, nalunaarummi allassimavoq.

Taassuma oqaluttuaraa illersuisuni oqaloqatigerusullugu saaffiginnittarsimagaluarluni, kissaatinili eqquutsinneqarsimanngitsoq oqaatigaa:

- Sapaatip akunneri marlunni oqaluutinngilara.

Nalunaarut naapertorlugu isertitsivimmut inissinneqartut pisinnaatitaaffiit, pisussaaffiit allallu inissinneqarnermi atugassat pillugit sulisuniit ilisimatinneqartartussaapput.

Tamannali pisimanngitsoq, Sermitsiamut oqaluttuaraa.

Angut inuusuttoq juunip ulluisa 21-annili tigummigallarneqartoq eqqartuussivimmut tallimanngornermi sassarteqqinneqassaaq, tassani aalajangerneqassaaq suli tigummigallarneqassanersoq imaluunniit aniguisinneqassanersoq.

Kalaallit Nunaanni Politiit suliaq pillugu oqaaseqarsinnaanngikkallarput, suliaq suli misissuiffigineqarmat.