Angummut 37-nik ukiulimmut Sisimiuneersumut eqqartuussineq imaannaanngitsuuvoq. Ulluni sisamani eqqartuussineq ingerlareersoq suli naammassineqanngilaq, taamaattumillu Nuummi nanginneqartussanngorluni.
Unnerluussisussaatitaasoq Alexander Stürup naapertorlugu ilisimannitttut sivisuumik killisiorneqarnerat kinguaattoornermut pissutaavoq.
Angummut 37-nik ukiulimmut Sisimiuneersumut eqqartuussineq imaannaanngitsuuvoq. Ulluni sisamani eqqartuussineq ingerlareersoq suli naammassineqanngilaq, taamaattumillu Nuummi nanginneqartussanngorluni.
Unnerluussisussaatitaasoq Alexander Stürup naapertorlugu ilisimannitttut sivisuumik killisiorneqarnerat kinguaattoornermut pissutaavoq.
– Ilisimannittut killisiorneri naammassivagut. Maanna suliap immikkoortua kingulleq Nuummi maajip 30-ani nanginneqassaaq, naatsorsuutigaarpullu ulloq taanna naammassissallutigu, Alexander Stürup Sermitsiamut oqarpoq.
Eqqartuussineq imaannaanngilaq. Pinerlunnerit piffissami sivisunerusumi pisimapput, eqqugaasut amerlapput uppernarsaatillu tigussassut aamma amerlallutik. National Kriminalteknisk Center (Pinerluttoqarnerani Naalagaaffiup misissueqqissaartartui aaqq.) ikiortigalugit unnerluutigineqartup eqqugaasullu inuit nittartakkatigut attaveqatigiittarfiini allaqatigiinnerat misissorneqarput.
Quppernerit tusindillit
- Ilisimannittut killisiorneqarnerat, aamma pinerluttup pinerlineqartullu allaqatigiinnerat quppernerpassuarnik tusindilinnik takissuseqartut eqqartuussivimmut ullut sisamat ingerlaneranni saqqummiunneqarput.
Unnerluutigineqartoq ilaatigut kannguttaatsuliorsimasutut, eqqissinermik akornusiisimasutut, kinguaassiuutitigut pinngitsaaliisimasutut, akiliilluni meeqqanik kinguaassiuutitigut atornerluisimasutut meeqqanillu tiingasulersaarutinik (porno) pigisaqartutut unnerluutigineqarpoq.
Pinngitsaaliinerit arlallit isertortumik immiunneqarsimasut — ilaatigut nalunaaqutaq immiussissutilik atorlugu unnerluussummi aamma allassimavoq. Politiit immiussissutini assigiinngitsuneersunit immiussarpassuarnik arsaarinnissimapput.
Immiussat taakku eqqartuussivimmi takutinnissaat piffissamik atuingaatsiarput.
Aammattaaq pinerluttoq inuusuttunik tiingasulersaarutinik (siornatigut meeqqanik tiingasulersaarutinik taaneqartartunik) amerlasuunik peqarsimavoq, taakkualu katillugit ulluni 41-ni isiginnaarneqarsinnaasimapput. Taakku unnerluussisussaatitaasut naapertorlugit inunnik 18-it inorlugit ukiulinnik immiussaapput, immikkoortunut 1, 2 aamma 3-nut immikkoortiterneqarsimallutik. Unnerluutigineqartup taakku pigalugit nassuerutigai.
Killiligaanngitsumik pineqaatissiineq
Unnerluutigineqartup killiligaanngitsumik pineqaatissinneqarsinnaanera naalagaaffiup eqqartuussissuserisuata aalajangertussanngorpaa.
- Nakorsat eqqartuussinermut siunnersortaasartut oqaaseqaataat pissarsiaraarput, killiligaanngitsumillu pineqaatissiisoqassanersoq naalagaaffip eqqartuussissuserisuata aalajangiiffigissavaa, Alexander Stürup nassuiaavoq.
Eqqartuussinerup ilaa matoqqasumik ingerlanneqaraluartoq, Nuummili inaarutaasumik eqqartuussineq tamanut ammassaaq.
