Sisimiuni nakuusertoqaqattaareersoq: Angutit inuusuttut pingasut eqqartuussivimmi sassartinneqassapput
Angutit inuusuttut pingasut Sisimiuneersut sapaatip akunnerata tulluani ulluni tallimani eqqartuussivilersuunneqassapput. Taakku assigiinngitsunut pisunut unnerluutigineqarput, soorlu nakuusernermut, angerlarsimaffimmik eqqissiviilliortitsinermut aserorterinermullu, siorasaarinermut, pinngitsaaliilluni atoqatiginninnermut, ilisimannittunik siorasaarinermut, akuersissuteqarani nakorsaatinik allagartaqarluni pisassanik pigisaqarnermut kiisalu pisortat oqartussaatitaannik nikassaanermut ajuallannartumillu oqaaseqarnermut.
Foto: Leiff Josefsen
Sisimiuni ukiuni kingullerni sakkortuumik nakuusernerit tusarsaapput, innuttaasunik illoqarfimmi ernumalersitsisumik.
Politiit angummik pinerluuteqarsimasumik sapaatip akunnerini pingasuni ujaasereersullu inunnik arlalinnik ukiortaap aallartisimalaarnerani tigusarinnipput. Angutit inuusuttut marluk ulloq manna tikillugu tigummigallarneqarput.
Maannakkullu angutit inuusuttut pingasut eqqartuussivimmi sassartinneqartussanngorput.
Pisimasut 15-it
Angutinut inuusuttunut pingasunut unnerluussutit ilaat arfinillit nakuusernermut tunngapput, tassani Sisimiuni illoqarfimmi unnuakkut pisimasuullutik. Taama unnerluussuumi Sermitsiap pissarsiarisaani allassimavoq.
Aamma unnerluussummi ilaatigut allassimavoq Sisimiuni imerniartarfiup Starlightip silataani decembarip ulluisa 23-anni nalunaaqutaq 03.15-mi angut nakuuserfigineqarsimasoq. Nakuuserfigineqartoq angutinik marlunnit niaqqumigut isimmittarneqarlunilu tukkarneqarsimavoq, alleqqumigut saamerlikkut talerperlikkullu ajoquserlugu.
Angutini pingasuusuni ataaseq aamma angerlarsimaffimmi eqqissiviilliortitsimasutut aserorterisimasutullu unnerluutigineqarpoq, tassani Sisimiuni inissiami matu silarleq isimmissimammagu innarlerlugu.
Pinngitsaaliineq ilisimannittunillu siorasaarineq
Unnerluutigineqartut ilaat aamma Sisimiuni oktobarip qaammataani siorna arnamik pinngitsaaliisimasutut unnerluutigineqarpoq.
Taassuma malitsigisaanik angut ilisimannittunik siorasaarisimasutut unnerluutigineqarpoq, tassani unnerluussut malillugu arnaq angutaataalu politiinut eqqartuussivimmullu nassuiaateqaratarsinnaaneri pillugit nakuuserfiginiarlugit siorasaarsimammagit.
Angut aamma akuersissuteqarani nakorsaatinik allagartaqarluni pisassanik pigisaqarsimasutut unnerluutigineqarpoq. Angutit unnerluutigineqartut marluk aamma pisortat oqartussaatitaannik nikassaanermik ajuallannartumillu oqaaseqarsimasutut unnerluutigineqarput, tassani unnerluussut malillugu Sisimiuni isertitsivimmi pisimapput.
Unnerluussisussaatitaasut piumasaraat angutit ilaat ataaseq ukiumi ataatsimi qaammatinilu qulingiluani pineqaatissinneqarsimasut inissiisarfimmut inissinneqassasoq. Angut aamma aningaasanik 17.159,55 koruuninik taarsiissasoq piumasarineqarpoq. Ilanngullugu mitallerneq pillugu 100.000 koruuninik taarsiissasoq piumasarineqarpoq. Nakorsaatinillu arsaarinnittoqarnissaa aamma piumasarineqarpoq. Taarsiiviginninnissamik piusamaqaateqartoqarnissaa sillimaffigeqquneqarpoq.
Angutit pingajuat qaammatini sisamani inissiisarfimmiitinneqarnissaa
Unnerluussisussaatitaasut aamma angutip aappaanut ukiumi ataatsimi qaammatinilu arfinilinni pineqaatissinneqarsimasut inissiisarfianni inissinneqarnissaa piumasaqarput. Tassani aamma arsaarinnissuteqartoqarnissaa piumasarineqarpoq kiisalu taarsiiviginninnissamik piumasaqaateqartoqarsinnaanera sillimaffigineqaqquneqaluni.
Angutit pingajuat pisuutinneqassaguni qaammatini sisamani pineqaatissinneqarsimasunut inissiisarfimmut inissinneqassaaq.
Eqqartuussivilersuussineq Sermitsiamiit malinnaaffigineqassaaq.
