Sisimiuni nammineq kajumissutsiminnik aqqusiniortut

Sisimiuni innuttaasut takornariallu maanna aqqusiniami pisuttuarlutillu sikkilersinnaalerput. Immaqalu paarnartarsinnaalerlutik.

Aqqusiniaq Sisimiuni Kangerluarsunnguaniippoq.

- Suliarinera sivisuvoq, naammassinerali nuannaarutigaarput. Aqqusiniaq kommunimut innuttaasunullu tunissutaavoq, Krister Støvlbæk Sermitsiamut oqarpoq.

Sunngiffimmi suliaq

Suliniut kommunimit Namminersorlutillu Oqartussaniit tapiiffigineqarluni piviusunngortinneqarpoq. Atortunut 300.000 koruunit missaaniittut aningaasartuutigineqarlutik. Nammineq kajumissutsiminnik suliaqartut taamaalillutik akissarsiaqaatiginagu suliaraat, nammineq piffissartik atorlugu.

- Klaus Møller erneratalu piffissarujussuaq atorpaat aqqusiniorlutik. Tamanna nuannaarutigaara, Krister Støvlbæk oqarpoq.

Krister Støvlbækkip oqaasii naapertorlugit Klaus Møller erneralu Malik akissarsiaqaratik aqqusiniorput. Illoqarfimmi sanaartortut atortunik atukkiussipput, taamaalillutik suliaq naammassisinnaasimallugu.

- Neriuppugut aqqusiniaq innuttaasunit takornarianillu atorneqarluarumaartoq. Aqqusiniap pitsanngorsarnissaanut pilersaaruteqarpugut, taperneqarluariarutta.

Kristeri nassuiaavoq nammineq kajumissutsiminnik suliaqarnertik peqquteqartoq. Sisimiuni qangaanerulaaq inuusimasut nammineq kajumissusertik atorlugu suliniuteqartarmata, nammineq aamma taamaaliorlutik:

- Siuligut nammineq kajumissutsiminnik suliaqartarsimaqaat siuarsaallutik, uagut aamma taamaaliorpugut.

- Kommunimut innuttaasunullu tunissutaavoq, Krister Støvlbæk qungujulluni oqarpoq.