Sisimiuni toqusut inaat toqusunullu ikuallaavik politikerimit kissaatigineqartut

Qeqqata Kommuniani toqusut inaannik peqalertariaqarpoq, kiisalu Sisimiuni toqusut timaannik ikuallaaveqalerluni. Taama siunnersuuteqarluni kommunalbestyrelsimut ilaasortaq, Navarana Lennert-Andersen (IA) kissaateqarpoq.

Taassuma siunnersuutaa Qeqqata Kommuniani kommunalbestyrelsimi ataatsimiinnermi aqagu sisamanngornermi oqaluuserineqassaaq.

Toqusut inaannik toqusullu timaannik ikuallaavittaarnissamut siunnersuut ilaqutariinnut ataqqinnittumik aliasunnissamik inuulluaqqusinissamullu, upperisaq apeqqutaatinnagu, periarfissiissasoq, siunnersuuteqartoq isumaqarpoq:

- Kuisimanngitsut, upperisaqanngitsut aammalu upperisaqaraluarlutik ilagiinni ilaasortaanngitsut eqqarsaatigalugit ilaqutarpassuaqarput. Imaassinnaavoq toqukkut qimaguttup ilaqutaasa nalugaat ilagiinni ilaasortaajunnaarsimasoq. Taava iliuusissaarullutik. Napparsimavimmi toqusut inaaninngaanniit ilisinissamik soorlu iluamik kusanartumik eqqissillutik ilisisinnaajunnaariasaarlutik, toqqaannarlu iliveqarfimmukaattariaqartarlugu. 

Piffissamut malinnaasariaqalerneq

Ullumikkut ilaqutariit ilaasa ilartik toqukkut annaasartik kuisimanngikkaangat uppertuunngikkaangalluunniit qanoq inuulluaqqusinnaanerlugu nalornissutigisarpaat.

Navarana Lennert-Andersen naapertorlugu kuisimanngitsut amerliartorput, ullutsinnilu pissutsit eqqarsaatigalugit tulluartumik ilineqarnissaat periarfissaanani. Ilaqutaasullu taamaattumik ataqqinnittumik ilisinissaminnut periarfissaqanngitsoortarlutik. Taamaattumik taanna isumaqarpoq uppertuunngikkaanni uppertuugaanniluunniit inuiaqatigiit inissaqartitsisariaqartut.

-  Soorlu inissaminiinnerussasoq sumiiffissamik pilersitsinissaq, imaanngilaq oqaluffik nutaaq pilersinneqassasoq. Assersuutigalugu jehovap nalunaajaasui oqaluffeqarput, kristumiut oqaluffeqarput, allallu. Ukua upperisaqanngitsut aamma upperisaqaraluarlutik ilaasortaanngitsut inuulluaqquneqarniarunik sumiiffissaqanngillat, isumaqarpunga 2024-imiittugut, isumaqarpungalu pissutsinut malinnaasariaqartugut.

Qeqqata Kommunia naapertorlugu eqqaaniaaniarluni kiisalu ilagiinnik ilaasortaanngitsunik ilisinissamut naalagiartitsinermik ingerlatsinissamut namminerisamik toqusunut inaateqanngilaq. 

Qeqqata Kommuniali eqqaaniaaniarluni naalagiartitsinissamut tulluartunik illunik arlalinnik pigisaqarpoq soorlu Amerdlok, Napparsimavitoqaq B-17 aamma Maniitsumi Oqaluffitoqaq. Qeqqata Kommuniata ilanngullugu eqqaavaa illut taakku pitsanngorsarneqarsinnaasut taamaalillutik atortui eqqaaniaalluni naalagiartitsinissamut tulluartunngortinneqarsinnaasut.

Inuup toqusimasup timaanik ikuallaavik sipaarutaassasoq

Navanara Lennert-Andersenip siunnersuutaanut ilaavoq Sisimiuni toqusut timaannik ikuallaavimmik pilersitsisoqarnissaa, tamanna ataqqinnittumik inuulluaqqusinissamut iluaqutaaginnarani kommunimut sipaaruteqassangatippaa.

-  Kommunimut sipaarutaangaatsiassagaluarpoq assaanissamut, soorlu ukiuunerani nuna mangertoq assannissaanik nukipassuit atorneqartarput, taamatuttaaq inuulluaqqusinissaq oqinnerulersinnaavoq nammineq aaqqissuussinermik inuiaqatigiit kiffaanngissuseqalernerulerpata.

Sisimiuni iliveqarfik nutaaq ilerrinut 350-inut inissaqarpoq aammalu ukiumut agguaqatigiisillugu ilerrit 60 atorneqartarput inniminneerneqarlutillu. Maannakkut iliveqarfiusoq 2030-mi ulikkaarsimanissaa naatsorsuutigineqarsinnaavoq, taamaattumik kingusinnerpaamik 2028-mi kommunalbestyrelsi aaqqiissutissamik nassaareersimasariaqassasoq, siunnersuummi allaqqavoq.

-  Toqusunut ikuallaaveqarnermi inissanut sipaarutaasussanik iluaqutitaqarmat iliveqarfimmik alliliinissamik sanaartornermi aningaasartuutinik ataatsimoortitsisinnaaneq naleqarpoq, kommuni allappoq.

Navarana Lennert-Andersenip siunnersuutini pillugu Inatsisartunut Naalakkersuisunullu allagaqartoqarnissaanik siunertaqarpoq.