Sisimiut: Nakuusertoqarnerani takunnissimasinnaasunik politiit ujartuipput
Sisimiuni nakuusertoqarnerani takunnissimasinnaasunik politiit ujartuipput. Angutip inuusuttup 18-it inorlugit ukiullip sapaatiummat unnuap qeqqartoq kattunneqarsimanini politiinut nammineerluni nalunaarutigaa.
Kalaallit Nunaanni Politiit
Assi: Oscar Scott Carl
Sisimiuni ikaartarfiup eqqaani sapaatiummat unnukkut qulip missaani nakuusertoqarnera politiit misissuiffigaat.
Angut inuusuttoq 18-it inorlugit ukiulik sapaatiummat oktobarip tallimaanni nalunaaqutaq 23.11 pisoq nalunaarutigalugu politiinut sianersimasoq, pigaartut pisortaat Aputsiaq Hansen oqarpoq.
- Angutip inuusuttup oqarnera naapertorlugu angutit saassussisut arlaqarput. Taanna uppissinneqarsimavoq timimigut niaqqumigullu isimmittarneqarluni. Kiinnamigut kimillanneqartoq misissorneqarnerani siullermi takuneqarpoq, Aputsiaq Hansen oqarpoq.
Politiit pisimasoq misissuiffigaat, takunnissimasinnaasunillu ujartuillutik. Takunnittunik suli saaffiginnittoqarsimanngilaq.
- Misissuinitsinnit nakuusertoqaqattaartoqarneranik takussutissaqanngitsoq paasivarput. Kisiannili pisoq misissuiffigaarput. Tassunga atatillugu sumiiffimmi tassani pasinarsinnaasumik eqqumiitsumilluunniit pisoqarneranik sapaatiummat takunnissimasinnaasut oqaloqatigerusuppagut, pigaartut pisortaat oqarpoq.
Pisumut tunngatillugu ilisimasallit politiinut uunga attaveqaqquneqarput: 70 14 48.
