Siulittaasoq kaammattuisoq: Ilisimatusarnermut aningaasaliissutit amerlanerusut pisariaqarput

Ilisimatusarluni suliniutit arfineq-pingasut Nunatsinni Ilisimatusarnermik Siunnersuisoqatigiinnit taperneqarput.  Puakkut nappaateqalersimanerup paasineqarneranit nakorsartinnerullu ingerlanneqarnerannik, Nuup Kangerluani piffissap ingerlanerani sermersuup aakkiartornerani aamma ammassat kulturimi isumaqassusaat takussutissaqartinniarlugu missuinermik ilaatigut imaqassapput.

Siunnersuisoqatigiit maannakkut ukiumut 1,2 millionit koruuninik aningaasanut inatsimmit aningaasaliiffigineqartarput. Siunnersuisoqatigiilli siulittaasuat Mitdlaraq Lennert oqarpoq kalaallit ilisimatusarnerat aningaasanik amerlanerungaartunik pisariaqartitsisoq:

- Ukiumut 1,2 millioner kroninik aningaasaliiffigineqarnerup nunatsinni ilisimatusarfiusut aningaasaliiffigineqarnissaminnut pisariaqartitaannut suli annikippallaarput, Mitdlarak Lennertip tusagassiutinut nalunaarummi oqarpoq, nangipporlu:

- Nunatsinni ilisimatusartut nunani assigiinngitsuni aningaasaateqarfinnut qinnuteqakkajupput. Amerlanertigut iluatsittarput, aammali tamanna ilisimatusartut tapersersorneqarnerannut killiliisarluni.

Qinnuteqartuni angut ataasiinnaasoq

Kalaallit Nunaanni ilisimatusarnermi periarfissat tamakkiisumik atorneqanngitsut Mitdlaraq Lennert isumaqarpoq:

- Inuiaqatigiit ilisimatusarneq salliutissinnaassappassuk iluanaassagaluarput, tassuunami assigiinngitsutigut inuiaqatigiinnut, pinngortitamut, kulturimullu ilisimasaqarnerulersitsillunilu inuussutissarsiornermi ineriartornermut tunngaviusinnaavoq, oqarpoq.

Ukioq manna Ilisimatusarnermut tapiissutitut aningaasaliissutinut qinnuteqaatit tunniunnissaannut killigititaq qaangiummat katillugit aqqaneq-marluk qinnuteqarsimasut Ilisimatusarnermut Siunnersuisoqatigiit paasissutissiipput.

Arnat qinnuteqartut amerlanerupput, taakku aqqaniliullutik. Angutit ataasiinnaat qinnuteqarsimavoq. Tapiissut arfineq-pingasuusut tamarmik arnanut tunniunneqarput.

Suliniutit toqqarneqartut:

• Aili Labansen, Pinngortitaleriffimmi ilisimatooq, ‘machine learning’ atorlugu imaani timmissanik nakkutilliinermi periutsimik ineriartortitsisinnaanermut misissuinissamut. Suliniutaa pillugu uani atuarit

• Aviaja Lyberth Hauptmann, Ilisimatusarfimmi adjunkti, biologi Carsten Egevang peqatigalugu ammassat kulturikkut isumaqassusaannik takussutissaliornissamut. Uani paasisaqarnerugit

• Diana Krawczyk, Pinngortitaleriffimmi ilisimatooq, Nuup Kangerluani piffissap ingerlanerani sermersuup aakkiartornerani palæo-inuit nunasisarnerannut sunniuteqartarsimanersoq assiliorniarpaa. Suliniummi ilaatigut Frederik Fuuja Larsen, Nunatta Katersugaasivia Allagaateqarfianilu aqutsisoq aamma professor Marit-Solveig Seidenkrantz Århus Universitetimi Institut for Geosciencemeersoq suleqatigissavai. Uani paasisaqarnerugit

• Kirsty Langley, Asiaq-mi ilisimatooq, Kangerluarsunnguami aput misissorniarpaa, tassani sunneeqatigiiffiit assigiinngisut naasut, uumasut, inuillu apullu misissussallugit. Uani paasisaqarnerugit

• Marie Louis, Pinngortitaleriffimmi postdoc, ukiuni kingullerni Kalaallit Nunaanni aarluaarsuit assigiinngitsut marluusut siaruaakkiartorsimasut pillugit pinngortitaleriffimmi ingerlatsivimmut siunnersuinissamut tunngavissamik ineriartortitsiniarpoq. Uani paasisaqarnerugit

• Najaaraq Demant-Poort, Ilisimatusarfimmi ph.d.-nngorniaq, inooqataanermi tatiginninneq suliffeqarfinnullu tatiginninneq pillugit misissuiniarpoq. Uani paasisaqarnerugit

• Narissa Bax, Pinngortitaleriffimmi postdoc, imaani kulstofit qanoq annertutigisut qeqqussaniinnersut misissorniarpaa. Uani paasisaqarnerugit

• Umbreen Yousaf, Dronning Ingridip Napparsimavissuani nakorsaanerup puakkut nappaateqalersimanerup paasineraniit nakorsartinnerup ingerlanera misissuiffiginiarpaa – taannaavorlu Kalaallit Nunanni kræfti takussaanerit ilagisaat. Uani paasisaqarnerugit