Siulittaasoqarfimmit kissaatigineqartoq ataatsimiititaliami maluginiarneqartoq
Inatsisartut Siulittaasoqarfia sipaarfigineqannginnissamik kissaateqarnera naapertuutinngitsoq Aningaasaqarnermut Akileraartarnermullu Ataatsimiititaliami amerlanerussuteqartut isumaqarput.
Aningaasaqarnermut ataatsimiititalimut ilaasortat aammalu Qeqertarsuatsiaani Kapisilinnilu Nunaqarfinni aqutsisunut ilaasortaq. Saamerlermiit: Ataatsimiititalimut ilaasortaq Margrethe Thårup Andersen, Jørgen Rosbach, ataatsimiititaliap siulittaasua Erik Jensen, nunaqarfimmi aqutsisunut ilaasortaq Kâlêrak' Ringsted aamma ataatsimiititaliamut ilaasortamut sinniisoq Kuno Fencker.
Assi: Inatsisartut
Naalakkersuisut aningaasanut inatsisissatut ukioq manna isumaqatiginninniarnissamut siunnersuutaat killeqartorujuuvoq, ilaatigut Namminersorlutik Oqartussat aningaasartuutaannik sipaarniartoqangaatsiarnissaa siunertarineqarluni – assigiimmik annertussusilimmik tamani sipaaruteqarnermik taaneqarluni.
Inatsisartulli Siulittaasoqarfianit sipaarniarfigineqannginnissaq kissaatigineqarpoq, tamannalu Inatsisartut Aningaasaqarnermut Akileraartarnermullu Ataatsimiititaliaata maluginiarpaa:
- Ataatsimiisitaliamiillu amerlanerussuteqartuniit maluginiakkatta ilagaat piffissami matumani, annertuumik sipaarniarfiusussami Inatsisartut siulittaasoqarfiat kisiartaalluni tamakkiisumik akitigut nalimmassaalluni qaffaanissaminik ingerlatsivigineqarnissaminik kissaateqarsimanera, ataatsimiititaliaq tusagassiorfinnut nalunaarummi allappoq.
Ataatsimiititaliap siulittaasuata Erik Jensenip (S) tusagassiutinut nalunaarut Sermitsiamut itisilerlugu ima oqarpoq:
- Soorunami siulittaasoqarfiup tamanna kissaatigaa, tamannalu ataqqisariaqarparput. Allalli sipaarniaqquneqarpata kissaatigineqartoq silatusaarnerunngitsoq isumaqarpugut.
- Naalakkersuisut sipaarniartussaapput, kommunit nalimmassaavigineqassanngillat. Siulittaasoqarfilli tamakkiisumik akitigut nalimmassaalluni qaffaarusuppoq. Tamanna naleqquttuusorinngilarput, taamaattumillu eqqumaffigisariaqarlugu, Erik Jensen oqarpoq.
Sipaarniarfigineqartut isumaliutigineqartariaqartut: Inuussutissarsiutit ineriartortittariaqarpavut
Siulittaasoqarfiup kissaataata saniatigut, sipaarniarfigineqartut ataatsimiititaliamit aamma apeqquserneqarput:
- Assigiimmik annertussusilimmik tamani sipaaruteqarnikkuinnaq ajornartorsiut qaangerneqarsinnaanngilaq. Sipaarutissat aningaasanut inatsimmi siunertanut assigiinngitsunut aningaasaliissutinik aqutsinermut qanoq kinguneqassanersut sukumiisumik isumaliutigisariaqarpavut, ataatsimiititaliami amerlanerussuteqartut tusagassiorfinnut nalunaarummi allapput.
Nunap aalisarneq kisiat inuussutissarsiutiginagu allanik aamma aningaasarsiorfiusinnaasunik ujartuinissaq ataatsimiititaliamit ukkatarineqassasoq, Erik Jensen nassuiaavoq.
- Inuussutissarsiornermi assigiinngitsutigut siuariartornissaq pisariaqartipparput. Inuussutissarsiorfiit sipaarniarfigineqartut ineriartortinneqarsinnaanersut apeqquserneqarsinnaavoq, Erik Jensen oqarpoq, nangipporlu:
- Naalakkersuisut peqatigalugit allanik periarfissarsiorsinnaasugut isumaqarpugut, kisianni inuussutissarsiutit tunngaviusumik ineriartortinnissaat pineqarluni.
Isumaqatiginninniarnerit pissanganartut
Namminersorlutik Oqartussat ingerlatseqatigiiffiutaanni ukiuni tulliuttuni iluanaaruteqarnissamik naatsorsuutaanikuugaluit 100 millionit koruunilikkaanik ikileriarnerat pissutigalugu aningaasaqarneq sunnerneqarujussuartoq, Erik Jensenip aamma erseqqissarpaa.
- Isumaqatiginninniarnerit qanoq ingerlassanersut pissanngatigaara. Inatsisartuni pingasoriarlugu suliarisussaavarput, taamaattumik allannguuteqarnissaa ilimanaateqarpoq, Erik Jensen oqarpoq.
Sermitsiap Inatsisartut Siulittaasoqarfianit sipaarfigineqannginnissamik kissaateqarneq pillugu oqaaseqartitsiniarluni sulissutigaa.
