ISSITTUMI SIUNNERSUISOOQATIGIIT
Siulittaasuuffik Issittormiut atugaasa pitsanngorsarnissaanut atorneqassaaq
Ukioq marluk tulliuttut nunat killiit innuttaasa atugaasa pitsanngorsarnissaanut atorneqassapput naalagaaffeqatigiit Danmarkimiit Arktisk Råd-imi siulittaasuuneranni. Anguniagaavoq eqqissisimasumik attassisimasumillu Issittoq, nunat killiit innuttaasa atugaasa eqqarsaatigalugit nunat killeqarfiisa akimorlugit qanittumik suleqatigiinnikkut.
På vegne af Kongeriget Danmark præsenterer Naalakkersuisoq for udenrigsanliggender, Vivian Motzfeldt (S) et omfattende arbejdsprogram, der skal gennemføres under formandskabet i Arktisk Råd 2025-2027.
Asseq toqqorsivimmit: Leiff Josefsen
Issittumi sukkasuumik silap pissusaa allanngoriartorpoq, tassanilu innuttaasut atukkatik pillugit ineriartortitsisoqarnerani namminneq sunniuteqarsinnaanerat annikinneruvoq. Kalaallilli Nunaanni innuttaasut sunniuteqarsinnaanerat allaanerulluni, tassami kalaallit pineqartillutik namminneq sunniuteqarsinnaanerminnik ujartuinerat Danmarkimit annertunerujartuinnartumik akuersaarneqarpoq, pingaartumik ukiut qulikkaat kingulliit ingerlaneranni, Kalaallit Nunaat suliassaqarfinni Kalaallit Nunaannut Issittumullu tunngassuteqartuni annertusiartuinnartumik piginnaatitaaffeqaleriartorpoq.
Taamaattumik aamma ilaatigut Kalaallit Nunaat, Norgemit siulittaasuunerup tigunissaanut piareersarnerni, kiisalu Kunngeqarfik Danmarkip siulittaasuunerani sulissutigisassat pillugit maanna saqqummiunneqartumi Kalaallit Nunaat annertuumik sunniuteqarluarsimavoq.
Naalagaaffeqatigiit Danmarkip siulittaasuunerani suliassaqarfiit pingaarnerit tassaassapput Issittumi aningaasaqarnikkut ineriartortitsineq piujuartitsisoq, taannalu pissasoq Issittumi nunap inoqqaavinut annertuumik iluaqutaasussanngorlugu.
Arktisimi nunap inoqqaavinut sammisaq
Sulinissamut pilersaarut qimerluuginnarlugu ersersitsivoq pingaartinneqartoq nunap inoqqaavisa Issittumi nunat killeqarfiisa akimorlugit sunniuteqaqataallutillu suleqataanissaat pingaartinneqartoq, aammalu silap pissusaanut, naasunut uumasunullu, minnerunngitsumillu inuuniarnermut tunngasunik Issittumi nunap inoqaaavisa ilisimasaat atorneqassasut Issittumi Siunnersuisooqatigiit sulineranni siunissaq qaninnerusoq ungasinnerusorlu eqqarsaatigalugit siunnerfilersuinermi.
Issittumi Siunnersuisooqatigiit suliat ingerlateriigaasa ingerlateqqinneqarnissaasa, ilaatigut 2021-mi akuersissutigineqartoq aammalu annertoorujussuarmik suliaqartoq "Arctic Council Strategic Plan 2021 to 2030", ilutigitillugu Kunngeqarfik Danmarkip siulittaasuunerani suliniutit nutaanik Issittumi innuttaasut atugaat qitiutillugit ingerlatsisoqassaaq:
Suliniutissat qulequttanut tallimanut agguaanneqartut tassaapput:
- Nunat inoqqaavi kiisalu Issittumi inoqarfiit
- Nammanneqarsinnaasumik aningaasarsiornikkut
ineriartorneq aamma Nukissiutitigut ikaarsaarnermi aaqqiissutit
- Imartat
- Issittumi silap pissusiata allanngornera
- Uumasut assigiinngitsut ikiliartussanngitsut
Taamatuttaaq maluginiarnarpoq nunat killeqarfiisa akimorlugit inuusuttut suleqataatinneqarnissaat siunnerfigineqartoq, tassunga atatillugu inuusuttut najugaqariaasiat, peqqissusaat aammalu inatsisit naapertorlugit inuuneqarnerat, tassunga ilanngullugu pinerluttulerinermut inatsisinik malinninnerat, ilisimasaqarfigineqarpiarneqanngimmata sammineqassamaarput.
Tamatuma saniatigut siulittaasunngortussat, Danmark/Kalaallit Nunaat/Savalimmiut aamma suliniuteqassamaarput suliniut "Local2Global" siuarsaqqissallugu, pingaarnertut anguniarneqassalluni Issittumi innuttaasut timikkut tarnikkullu peqqissusaannik siuarsaanissaq kiisalu Issittumi imminornerit pinaveersaartinnissaat.
Arnat angutillu naligiissitaanerat aamma suliniuteqarfigineqassasoq siunnerfigineqarpoq. Tassunga ilaatigut pissutaatinneqarluni Issittumi arnat atugarisaasa ilisimaneqarpianngitsut qulaajaavigineqarnerisigut suiaassuseqatigiit naligiinnerulernissaannik angusaqarusunneq.
Siulittaasuuffik pisortatigoortumik tunniunneqassaaq maajimi Tromsømi Norgemi.
