Siumup malittarisassaanut allannguutissat malunnaatillit
Siumup siulersuisuuneri tunuartussat partiip malittarisassaanut allannguutissat ikittuaqqat, taamaattorli sakkortuut saqqummiuppaat. Ilaatigut partiip siulersuisuuneri ilaasortaajunnaarsitsisinnaanngussapput, ullumikkut immikkoortortaqarfiit kisimik ilaasortaajunnaarsitsisinnaapput.
Foto: Jensine Berthelsen
Partiimut akileraarutit atorunnaarsinneqassappat? Taamak isumaqarput siulersuisuunerit tunuartussat.
Kia kommunalpolitikimi isumaqatigiinniarnerit siuttuuffigissavai? Qinigaanerpaap, taamak isumaqarput siulersuisuunerit tunuartussat.
Qanoq partiip attaveqarnera immikkoortortaqarfinnut nukittorsarneqassava aammalu partiip ulluinnarni oqallinnermi ersarinnerulernissaa qanoq qulakkeerneqassava? Siulersuisuunerit tunuartussat isumaqarput politikkikkut siulittaasup tullia kiisalu aaqqissuussaanikkut siulittaasup tullia partii naalakkersuisooqatigiinniilissappat sinniisussaat taakku atuuffiinut ikkunneqartalissasut.
Siulersuisuunerit ilaasortaajunnaarsitsisinnaasariaqarput
Partiip iluani pisunut tunngasutigut avammullu sammisutigut malittarisassanik unioqqutitsisimasut ilaasortaajunnaartinneqarnissaat sooq taamak ajornakusoortigaa? Siulersuisuunerit tunuartussat isumaqarput siulersuisuunerit siunissami ilaasortaajunnaartitsisinnaasariaqartut.
Taanna siunnersuutigineqarpoq partiip Qasigiannguani 2023-imi ataatsimeersuarnerani nalaanneqarsimasut innersuussutigalugit, tassanimi Siumut Nuuk "unioqqutitsilluni" ataatsimeersuarnermi aallartitaasinnaasut qaangerlugit amerlanernik aallartitsisimammata.
Malittarisassanik allannguutissatut siunnersuutit taakku ualeq manna ulloq qeqqareernermi oqaluuserineqassapput.
Taamatuttaaq ataatsimeersuartut ullup qeqqarlutik unillatsiarnissap tungaanut oqallisigaat partiip politikkikkut anguniagai "naannerulersinneqarsinnaanersut", siulersuisuunerit tunuartut isumaqarput partiip politikkikkut anguniagai 58-nik qupperneqartut atuaruminaappallaartut.
