Siumup naatsorsuutai aappaluttut - 231.000 koruuninik amigartoorpoq

Partiip ingerlatsinerminik ingerlaannarnissaanut, aalajangiisuussapput aningaasartuutinik aningaasanillu aqutsilluartoqarnissaa, aammalu 2024-mut missingersuut sinneqartoorfiusoq.

Siulersuisuunerit qimaguttussanngortut naatsorsuutigaat siulersuisut nutaat aningaasaqarnikkut sukannersumik ingerlatsiinnarnissamik malitseqartitsissasut, taamatut ingerlatsineq aammalu partiip tapiissutitigut isertitai kiisalu naatsorsuutini erseqqissarneqarpoq 2024 sinneqartoortoqartariaqartoq, partii ingerlatsinerminik tunngavissaqaannassappat.

Taamak annertutigisumik amigartoortoqarnerani partiip 2023-mi Qasigiannguani 2023-mi ataatsimeersuarnera 1,2 millionit koruuninik naleqartoq pissutaasunut annernut ilaavoq.

Partiip 2023-mi naatsorsuutiminik matusilernerani akiitsut 500.000 koruunit sinneqalaarput, tassannga bankinut (105.000 koruunit sinnerlugit), nioqqutissanik kiffartuussisunullu akiitsut (108.000 koruunit sinnerlugit) kiisalu akiitsut allat (333.235 koruunit). Akiitsut allat tassaapput A-akkissaatit AMA-mullu akiliutit, feeriarnissamut aningaasat, akileraarutitigut feeriarnissamut aningaasat, soraarnerussutisiaqartussanut akiligassat.

Partiimut akileraarutip peerneqarnissaa akuerineqanngilaq

Siulersuisuunerit qimaguttussanngortut siunnersuuteqaraluarput partiimut akileraarutit atorunnaarsinneqassasut. Taakku imatut iluseqarput:

• Inatsisartut ilaasortaat: 1.000 kr. qaammammut.
• Inatsisartut siulittaasuat: 2.000kr. qaammammut.
• Naalakkersuisut ilaasortaat: 2.000kr. qaammammut.
• Folketingimi ilaasortaq: 2.000kr.qaammammut.
  
• Borgmesterit: 2.000kr.qaammammut.
• Borgmesterimut tullersortit: akileraarutit kingorna isertitat netto 5%-ii, qaammammut.
• Kommunalbestyrelsimi ilaasortat: 400 kr. qaammammut.
• Kommunalbestyrelsimi siulittaasut ataatsimiititalianilu siulittaasut: 500 kr. qaammammut.
• Nunaqarfinni aqutsisunut ilaasortat: 150 kr.qaammammut.
  

Siunnersuut ataatsimeersuarnermi peqataasunit amerlanerpaanit itigartinneqarpoq. Qinikkat nangittumik partiimut akileraarummik akiliisarusupput. Illuatungaanilu partiip allattoqarfianit erseqqissaatigineqarpoq assut pisariusimasoq akiliisitsiniartarneq.