Siumup siulersuisuuneri piaartumik ataatsimiissapput
Siumup siulittaasuata, Erik Jensenip, Sermitsiamut uppernarsarpaa Siumup siulersuisuunerinut ataatsimiigiaqqusisimalluni, aammalu naatsorsuutigaa partiip kingusinnerpaamik aqagu tallimanngornermi avammut nalunaaruteqarnissaa.
Naalakkersuisut, Inuit Ataqatigiit aamma Siumut, Siumup Inatsisartuni ilaasortaanit ilungersunartorsiorneq pillugu sulinerat aallaavigalugu maanna arlalinngortunit sakkortuumik isornartorsiorneqarput, maanna partiip siulersuisuuneri ataatsimiissapput ineriartorneq pisoq aallaavigalugu.
Assiliisoq: Leiff Josefsen
Naalakkersuisuni ulapputtoqarpoq, Kalaallit Nunaata, Danmarkip USA-llu akornanni naalakkersuinikkut ajornartoornerup aaqqiiviginiarnera kisiat pinnagu, aammali iluminni ajornartorsiutinik aaqqiiniarlutik. Taamaattorli Siumup naalakkersuisooqatigiinni tunuliaqutaannit, ajornartorsiornerup aaqqiiviginiarneranut sulinerat pillugu isornartorsiuinerat ingerlaavartoq pissutigalugu, suliniarnerat ajornakusooraluttuinnarpasimmat.
- Uppernarsassavara Siumup siulersuisuuneranut ataatsimiigiaqqullugit aggersaasimagama, aammalu qanoq iliortoqassanersoq kingusinnerpaamik aqagu nalunaarutigissagipput uppernarsarsinnaavara.
Naalakkersuisut nunat allat akornanni ajornartorsiornerup sulissutiginninnerannut Siumumi ilaasortat ataasiakkaat isornartorsiuinerat kinguneqartinneqassava?
- Siulersuisut ataatsimiinnissaat aalajangiinissaallu sioqqullugu oqaaseqarusunngilanga, oqaaseqarsinnaanangalu, maannakkorpiaq uppernarsaannarsinnaavara ataatsimiittoqassasoq, kingorna siulersuisuunerit nalunaaruteqassapput.
Erik Jensenip oqaatigiumanngilaa partiip siulersuisuuneri qaqugoqqissaaq ataatsimiissanersut.
Siumut Nuummi siulittaasuata, KNR naapertorlugu piumasaraa Inatsisartuni ilaasortaq Kuno Fencker Siumumi ilaasortaajunnaartitaassasoq.
