Siumup siulittaasua: Fencker ilaasortaaginnassaaq

Nunarsuarmi politikkimut tunngatillugu Siumup alloriarnissaa tulliuttoq ulluni kingullerni utaqqineqarpoq.

Kuno Fencker kisimiilluni USA-mut angalanerata Kalaallit Nunaatalu namminiilivinnissaa pillugu oqaaseqarnerata kingorna Fencker isornartorsiorneqangaatsiarpoq.

Donald Trumpip nunap aqunneqarnera pillugu oqaaserisai pillugit partiit tamarmik ataatsimoornermik oqariartuuteqarneranni Kuno Fenckeri (S) Amerikamut angalavoq politikkikkut soqutigisaqaqatigiinnernut kisimiilluni ataatsimeeqateqarluni.

Maanna Siumup siulittaasua Erik Jensen nalunaarpoq partiip siulersuisuunerisa aalajangersimasunik isummerfigisassaqanngitsut imaluunniit aalajangiissanngitsut. Tamanna pivoq naak Siumut Nuuk tusagassiuutitigut Kuno Fencker ilaasortaajunnaarsinneqartariaqartoq oqariartuutiginikuugaluaraat.

Erik Jensen ima nassuiaavoq:

- Siumut partiitut qanoq ilaasortamik nalilersuiffigineqarnissaannut tunngasut malittarisassat marlussunnik periarfissiissuteqarnerannut tunngaveqarpoq. Periarfissat siulleraat ilaasortaajunnaarsitsinissamik aalajangerneq immikkoortortaqarfinniit tunngavilersukkamik allakkatigut aallartinneqarluni aalajangerneqarsimassasoq, periarfissallu aappaat tassaavoq Inatsisartut gruppeanni akunnerminni peersitsinissaminnik aalajangiussaqarsimasussaammata, Erik Jensen oqarpoq, nangillunilu:

- Taakku arlaannaalluunniit pisimanngillat, taamaammallu Siulersuisuunerit imaluunniit Inatsisartut gruppe pineqartumut isummerfissaqanngillat, malittarisassat tunngavigalugit sulineq ingerlattussaammat.

Namminiilivinnissaq pillugu apeqqut

Siumup siulersuisuunerisa innuttaasut Siumup namminiilivinnissamut suliniummut qanoq isiginnittaaseqarneranik aamma USA-p politikkikkut suliniummut qanoq akuliutsigisinnaaneranik oqariartuuteqarnissaat utaqqigaat maluginiarpaat.

Partiip namminiilivinnissaq anguniagarigaa partiillu politikkikkut aalajangiussaa ataqqineqartariaqartoq Erik Jensen allappoq:

- Erseqqissassavarali naatsorsuutigilluinnaqqissaarakku, apeqqummi tassanittaaq Siumup ataatsimeersuarneranit aalajangersakkat tunngavigalugit ingerlatsisoqartoq, pisariaqassappallu immikkuullarissumik pisoqarnerani taakkua tunngavigalugit sulineq naleqqussaanissallu ingerlanneqassammata. 

- Siumullu isummernissaa inuppassuarnit utaqqineqartoq nalunnginnakku, Siumup aqqutissatut aalajangersarsimasai piffissami qaninnermi avammut nalunaarutigineqassapput. Nalorninaatsumik Siumumi nunarput inuilu sumut ingerlassanersut aammalu aqqutit suut atorneqarnissaat ilanngullugit, oqarpoq.

Sulinngiffeqarniassaq imaluunniit naamik

Naalakkersuisut ilaat Kuno Fencker Inatsisartunit ilaasortaajunnaarsinniarlugu Inatsisartuni sulinngiffeqarnertik atorunnaarsinniaraat Sermitsiami sapaatip-akunnerani kingullermi allaaserineqarpoq.

Sulinngiffeqarniarluni aalajangerneq Naalakkersuisunut ilaasortat nammineq aalajangigassarigaat Siumup siulittaasuata erseqqissarpaa:

- Qinersisartut qinigaat namminneq pisinnaatitaaffeqarput aalajangissallugu, Inatsisartuni sulinermut qaqugukkut tamakkiissumik uteqqikkumanerlutik. Uangalu partiimi siulittaasutut inatsisartuni qinikkat tamaasa piginnaasaat assigiinngisitaartut atorluarlutigit ataatsimoortissallugullu sulinera ingerlappara.

- Naggataatigut erseqqissarusuppara, ulluni makkunani Nunatta imaanaanngitsumik inissisimanerani Nunarput sinnerlugu Naalakkersuisut sulisussaammata akisussaassuseqartuullutillu. Sulinermi tassani partii Siumut tamakkiisumik tunuliaqutaavoq, naatsorsuutigaaralu Siumut sinnerlugu suliaqartut tamarmik tamanna ataqqeqqissaarlugu sulissasut, Erik Jensen oqarpoq.