Siumut aningaasanut inatsisissatut isumaqatigiinniarnernut piumasaqaateqarpoq
Siumut Tunumi aalisarnermik inuussutissarsiuteqartunut ikiorsiiniarpoq, aappaagumullu aningaasanut inatsimmi imermik tarajuiaavimmut, taamaalillunilu imermik tarajoqanngitsumik pilersuinissamut, aningaasaliisoqarnissaanik piumasaqarpoq.
Fotograf: Leiff Josefsen
Siumut aalajangiisuussappat nunaqarfiit Sermiligaaq aamma Isortoq tarajuiaaffeqalertariaqartut, partiip nalunaarutaani allassimavoq.
- Taakku Aningaasanut Inatsisissamut Siumup piumasaqaataasa ilagaat, aalisarnerullu ineriartortinnissaanut suliniutinut nangitsinerullutik, nalunaarummi allassimavoq.
Tarajuunngitsumik imissaaleqineq
Nunaqarfinni taakkunani marlunni aalisarfiusuni imermik tarajuunngitsumik amigaateqarfiusuni, Tunumi aningaasaqarnikkut ineriartornerup tapersersornissaanik kissaateqarnermik, partiip piumasaqarnera tunngaveqarpoq.
- Taamatuttaaq Isortumi puisit amiinik qassaavimmik pilersitsinissamik akimmiffiusoq tassaavoq imermik pilersuinissaq, tamannalu tarajuiaammik pilersitsinitsigut qaangerneqassaaq, partii naqissusiivoq.
