Siumut folketingimi ilaasortaaruppoq

Siumup folketingimi ilaasortaatitani annaavaa. Tassunga pissutaavoq Aki-Matilda Høegh-Dam-ip toqqarmagu Siumumi ilaasortaajunnaassalluni.

Tamanna tusagassiuutitigut nalunaarutigeqqammerpaa.

- Matumuuna Siumut ilaasortaajunnaarfigalugu pisortatigoortumik partiimut siulittaasumullu nalunaarutigeqqammerakku, taanna tusagaassiorfinnut nalunaarpoq nangillunilu:

- Tamanna oqittuinnaanngimmat sapaatip akunnerata naanerata tungaanut eqqissisimaarfigilaassavara.  Eqqarsaaterpassuit imaannanngitsut nalaakkakkit neriuppunga tamanna paasinniffeqarfigalugu piffissamik pisariaqartitinera ataqqineqassasoq, kingornali tutsaqarfissanngorumaarpunga apeqqutisilu akisinnaalerumaarpakka, politikeri erseqqissaaavoq.

Taamatut nalunaarnera maanna takkuppoq, ullut arlaqanngitsut matuma siorna  Aki-Matilda Høegh-Dam-ip Siumup siulittaasuanut Erik Jensenimut partiimullu isornartorsiuereersorlu naalagaaffinngornissamut apeqqummi arriippallaartumik sulisoqarneraalluni.

Aki-Matilda Høegh-Dam ilisimatitsinngilaq, partiimut allamut nuussaguni sorlermut nuukkumaarnerluni, taamatuttaaq ilisimatitsinngilaq Inatsisartunut qinersinermi 11. martsimi ingerlanneqartussami sassarumaarnerluni.

Folketingimut qinersinermi Aki-Matilda Høegh-Dam qinigaarujussuarpoq 6.670-init taaguunneqaarluni.

Taamaattoqarneratigut Siumup aappassaa folketingimi qinigaaffiup ingerlanerani issiavini annaavaa. Tamanna aamma pinikuuvoq 2016-mi, taamanikkut Aleqa Hammond Siumumit anisitaagami, tamatumalu malitsigisaanik attaviitsutut folketingimi sulilluni.

Erik Jensen akissuteqarpoq

Siumup siulittaasua Erik Jensen ualeq manna Facebookimi quppernermini pisut pillugit akissuteqarpoq.

Partiip siulittaasuata erseqqissaatigaa Siumup anguniagai tunngavigalugit partii ullut tamarluinnaasa sulisoq:

- Siumup anguniagai tummaataralugit sulineq ileqqorinngilarput. Anguniakkalli suleqatigiinnikkut suleqateqarnikkullu majuarfissagut ataatsimoorluta qaqisinnaavagut, timitalertarlutigillu, partiip siulittaasua allappoq nangillunilu:

- Taamaassorinninneq aammalu inuit isumarinngisaannik isumalersorlugit oqalutsitsineq neriuppunga tamaannga killeqartinneqassasoq.