Siumut IA-lu Qeqqata Kommuniani suleqatigiilersut

Tallimanngornermi ulloq 4. april Siumut Malik Berthelsen siuttoralugu Inuillu Ataqatigiit Qeqqata Kommuniani suleqatigiinnissamik isumaqatigiissummik, ukiuni tulliuttuni sisamani atuuttussamik atsioqatigiipput.

- Kommunimi toqqissimanissaq sulissutigineqassasoq, aningaasaqarnerup isumatuumik aqunneqarnissaa, ineriartortitsinerup aallunneqarnissaa kiisalu inuit ataasiakkaat sammineqarnissaat isumaqatigiissuteqartut isumaqatigiissutigaat.

Isumaqatigiissut malillugu kommunalbestyrelsi nutaaq tallimanik ataavartunik ataatsimiititaliaqassaaq.

Marlunngornermi ulloq 1. april kommunimut qinersinermi Siumut Qeqqata Kommuniani ajugaavoq. Malik Berthelsenip borgmesteritut ingerlaqqinnerani, Gedion Lyberth (S) borgmesterip tullersortaatut siullertut innersuunneqarpoq, borgmesterillu tulliata aappaatut inissaq Nivi Heilmann Eframsen (IA) tigussavaa.

Makku inassutigineqarput:

• Siumup atugarissaarnermut ataatsimititaliami siulittasuuneq tigussavaa

• Siumup ilinniartitaanermut ataatsimiititaliami siulittaasuuneq tigussavaa

• IA-p aalisarnermut, piniarnermut nunaqarfinnullu ataatsimiititaliami siulitaasuuneq tigussavaa

• IA-p teknikeqarnermut ataatsimiititaliami siulittaasuuneq tigussavaa

Atugarissaarneq, piniarneq takornariartitsinerlu aallunneqassapput

Ulluunerani paaqqinniffiit, meeqqat atuarfiannik nukittorsaaneq kiisalu utoqqat inuillu innarluutillit atugaasa aallunneqarnissaat, isumaqatigiissuteqartut isumaqatigiissutigaat.

Ulluunerani paaqqinniffinni atorfiit tamakkerlugit inuttalerneqarnissaat isumaqatigiissuteqartut ilungersuutigissavaat. Kommuni nunanit allamiunik iluatsilluartumik sulisoqartarpoq. Meeqqalli atuarfiat ukiuni tullerni sisamani aallunneqassaaq:

- Atuartitsinermi atortut piffissarlu atuartitsivik ineriartortinneqassaput kommunillu atuarfii suleqatigalugit ineriartortillugillu aaqqigallerneqassallutik. Meeqqat atuarfiani fagini ataasiakkaani angusat qaffassarnissaasa aallunneqarnissaat pisariaqartinneqarpoq, meeqqat atuarfiat pillugu isumaqatigiissummi allassimasoqarpoq.

Kommunimi pigisanut tunngatillugu kommunalbestyrelsimi suleqatigiit Siumut IA-llu piniartunut aalisartunullu talittarfeqarnerup pitsanngorsarnissaa sulissutigissavaat. Peqatigisaanik kommunimi kalaalimineerniarfiit nutarterneqassapput. Aalisartunik piniartunillu pitsaasumik oqaloqatigiinneq qulakkeerniarlugu, isumaqatigiissuteqartut kommunimi aalisartunut piniartunullu ambassadørinik pilersitsissapput.

Takornariartitsinermik ineriartortitsinermut tunngatillugu kommunip Kangerlussuup Sisimiullu akornanni ATV-nut aqqusinermik sulinini ineriartorteqqissavaa. Taamaalilluni piffiup nunallu eqqissisimatitap takornariat ornittagaattut atorneqarsinnaanera kommunip qulakkiissavaa, peqatigisaanillu takornariartitsinermut sammititamik inuussutissarsiornikkut ineriartorneq qulakkeerneqassaaq.