Siumut: Nalunaaqutaq pissusissamisut ingerlassaaq
Seqineq nuigaanngami nuisarpoq. Seqineq tarrikkaanngami tarrittarpoq, Siumut nalunaaquttamut nalinginnaasumut
nalunaaquttap ingerlaqatigiiffia UTC -3 malinneqarnissaanut siunnersuuteqartoq isumaqarpoq.
Leiff Josefsen
Inatsisartut ukiakkut 20. septembari aallartisimalerpat Karl Tobiassen (S) nalunaaquttap akunnerni marlunni kinguartinnissaanut siunnersuuteqartoq tusaaneqarsinnaassaaq.
Siumut inatsisissatut siunnersuuteqarpoq, nunatsinni nalunaaqutaq eqqortumik ingerlalissasoq, imaappoq UTC -3 uterfigineqassasoq.
Aasakkut nalunaaquttap siuartinneqartarnera atorunnaassasoq
Siunnersuutimi ilutigisaanik aasakkut nalunaaquttap siuartinneqartarnera atorunnaassasoq siunnersuutigaa. Siunnersuut akuerineqassappat, ukiamut oktobarip 27-ani nal. 24:00 nalunaaqutaq akunnernik marlunnik kinguartinneqassaaq 22:00-mut, kingornalu nikiseqqinneqarani.
- Seqineq nuigaanngami nuisarpoq. Seqineq tarrikkaanngami tarrittarpoq. Siunnersuummi aalajangersarneqarpoq nalunaaquttamut malitassaq aammalu nalunaaquttap ingerlaqatigiiffia sorleq Kalaallit Nunaanni malinneqassanersoq. Siunnersuummi siunnersuutigineqarpoq nalunaaquttamut malitassaq tassaassasoq UTC, aammalu nalunaaquttamut nalinginnaasumut nalunaaquttap ingerlaqatigiiffia UTC -3 malinneqassasoq, Karl Tobiassen tusagassiuutitigut nalunaarummini allappoq.
Nalunaaquttap nikisinneqarnera nalilersorneqassaaq
Naalakkersuisut siulittaasuat, Múte B. Egede Sermitsiamut juunip naalernerani oqarpoq nalunaaquttap ingerlaarfiata allanngortinneqarnera innuttaasuniit qisuariarfigineqareersorlu Naalakkersuisut iliuuseqarniarlutik. Tassani neriorsuutigaa nalunaaquttap nikinnera nalilersorneqassasoq.
Nalunaaquttap ingerlaarfiata allanngortinneqarnerata kinguneranik isornartorsiutit inuit attaveqaqatigiiffianni takussaapput. Isornartorsiortuni nuisimasut ilagaat Qupanuk Olsen, taassuma nalunaaquttap uterteqqinnissaa anguniarlugu atsiornernik katersivoq. Qupanuk Olsenip atsiornernik katersai aammalu innuttaasut oqaaseqaataat nalunaaquttap ingerlaarfia kingumut uterteqqinnissaanut Naalakkersuisunut Inatsisartunullu ingerlateqqissamavai.
– Atsiornerit tigunikuuagut. Suli atsiornerit tigunagit Naalakkersuisuninngaanniit aalajangernikuuvugut nalilersuisoqartariaqartoq, taamaammat atsiornernik katersisimasoq aamma nalunaarfigineqarnikuuvoq. Qujaffiginikuuarput aamma naalakkersuisut qanoq iliulersaarneranik nalilersuilernitsinnik tunngasunik anngussivigalugu, Múte B. Egede Sermitsiamut juuni naalersoq oqarpoq.
