Siunnersorneqarnissamik pisariaqartitsineq annertooq

Suliaq nipituuliorfiujunnaarpoq – aalisartunit piniartunillu amerlanerujartortunit saaffigineqartalerluta ineriartorluarpugut, siunnersorti Siverth Amondsen Aapisimeersoq, siusinnerusukkut Konfifatut ilisimaneqartumeersoq oqaluttuarpoq.

Siunnersuisarfik ulloq 1. juli 2023 KNAPK-mit, ukiuni 18-ni ingerlatsisumit QAK-mut ingerlateqqinneqarpoq. Tamanna piffissami sivisuumi aalassassimaartoqarluni, naalakkersuisut aallaqqaammut siunnersuisarfimmik utertitsinissamik kissaateqarnerannik, isumaginnittussarsiornerullu kingorna qalerualinnik aalisartut kattuffittaavannut taamani pilersinneqaqqammisumut tunniunneqarpoq.

- Aalisartut arlaatigut ilungersuuteqartut ullut tamaasa attaveqarfigisarpavut – taavalu ikiorniartarpavut. Kalaallit Nunaat tamakkerlugu sullipparput – ulluinnarnilu attaveqarnerput annertooq Teamsikkut ataatsimeeqateqarnikkut ingerlattarparput, tamatumali saniatigut Nuummi sineriammilu siunnersortit freelancerit arlallit suleqatigaavut, Siverth Amondsen, Aapisimi piffissaq tamakkerlugu sulisutuaasoq oqaluttuarpoq.

- Freelancerit immikkut ilisimasalittaraavut, taakku immikkut sammisaqartuupput, piffimmili aamma pisariaqartunik ilisimasaqarput.

Saaffiginnittarnerit amerlanerusut

Aapisi QAK-mut nuunneqarmat saaffiginnittartut tamaasa nalunaarsorluartarnerisigut nutaamik aallartittoqarpoq.

- Aapisimut saaffiginnittunut tamanut allattueqqissaarpugut. Tamanna ilisimasanik paasinnilluartitsisarpoq taamaalillutalu ilungersunartorsiutit aalajangersimasut sukkasuumik aaqqiissutissarsiffigisarpagut – peqatigisaanillu sumi ilungersunartorsiortoqarneranik paasissutissiilluartarpoq, Siverth Amondsen nassuiaavoq.

- Maanna ukiup suli kaajallannginnerani 2025-mi saaffiginnittut 500-t 600-llu akornanniilerumaartut eqqoriarsinnaavara – tamannalu ukiut marlungajaat matuma siorna aallartitsinitsinnut sanilliullugu annertuseriarneruvoq.

- Uatsinnut apeqqutigineqartartut assigiinngitsorujussuupput aalisarnermilu piniarnermilu immikkoortunut amerlasuunut sammisarlutik, ukiulli marluk matuma siorna aallartinnitsinnit apeqqutigineqartut annertuumik allannguuteqarput.

- Taamanikkut annertunermik ESU-mi taarsigassarsiat kommuninullu attaveqarnerit inuussutissarsiortunut ilungersuatitsisarput, ukiunili kingullerni ingammik PNNP-mik pisassiissutit aalisarnermullu inatsit nutaaq pillugu ilungersuutit siunnersuinerilli piffissamik atuiffiupput.

- Siunnersuineq immikkoortunut pingaarnernut marlunnut avinneqarsinnaavoq – pisinermut atatillugu atortunillu pisinermi siunnersuineq, aappaatullu inatsisit aningaasaqarnerlu pillugit siunnersuineq.

Misissueqqissaarneq pingaarutilik

Aapisip aalisartut ataasiakkaat inissisimanerisa misissorluartarnera pingaartippaa.

- Saaffigineqaraangatta misissueqqissaarneq annertuumik suliarisarparput. Aalisartut ataasiakkaat ulluinnarni inuunerisa aaqqissuunnissaa, akuersissutaasa aaqqissuunnissaat, pisassaasa aaqqissuunnissaat, aningaasaqarnerisa aaqqissuunnissaat, sillimmatit ilaallu ilanngullugit – kingornalu ukiup ingerlanera pillugu ikiorsinnaavarput, taamaalilluni aalisartup iliuusissat eqqortut qaqugukkut iliuuserinissaat ilisimassavaa, Siverth Amondsen oqarpoq.

- Taamatut misissueqqissaarnerit suliarisarnerat immaqa pisariulaartutut isigineqarsinnaagaluarpoq, tamannali aalisarnerup ungasinnerulaartoq isigalugu piujuartitsisunngortinnissaannut pisariaqarpoq. Assersuutigalugu angallatip aserfallatsaalineqarnissaa pisariaqarpoq. Taamaalilluni atorsinnaanera sivisunerusarpoq, piffissallu piniarfiup nalaani motooriiarnernik pinaveersimatitsisarluni.

Aalisarnermik piniarnermillu inussutissarsiorneq ukiuni kingullerni annertuumik ineriartorpoq. Siusinnerusukkut tamanna ataatamit ernermut ingerlaqqittarpoq. Ullumikkulli inuiaqatigiit annertuunik piumasaqartarput – aningaasaqarnerlu inatsiseqarnermullu tunngasut initoorujussuupput.

- Sukumiisumik siunnersuinermut tunngatillugu arlalitsigut ikiuussinnaavugut. Inuit ilaannut ilungersuutigisat iliuuseqarfiginissaanut siunnersuineq naammattarpoq, allanulli oqartussanut tuniniaasartunullu naapitsinissamut ikiorneqarnissaq pisariaqarsinnaasarpoq.

- Amerlasuunut assersuutigalugu aningaaserivimmik naapitsinissami ikorfartorteqarnissaq toqqissisimanarineqarsinnaasarpoq. Taamattaarlu aamma pisortanut, eqqartuussissuserisumut, kukkunersiuisumut, naatsorsuuserisumut tuniniaasumullu allakkiornermi ikiuussinnaavugut.

Ataatsimiinnissanut aalajangersumik ikiuunneq

Aapisi ukiup ingerlanerani sineriammut arlaleriarluni angalasarpoq. Taamattaaq Aapisi saqqummersitsinerni soorlu Polar Expo Ilulissani Danfishimilu Aalborgimi peqataasarpoq.

- Saqqummersitsinerni ulapittarpugut. Tassanimi aalisartut nutaanik isumassarsisarput – tassanilumi aamma amerlasuut annertuukkaanik pisiortortarput, Siverth Amondsen, sapaatip akunnerani kingullermi freelanceritut siunnersorti Nuka Lyberth, Aapisip motoorinut teknikimullu immikkoortumi immikkut ilisimasalittaa peqatigalugu Aalborgimi Danfishimi peqataasoq oqaluttuarpoq.

- Amerlasuut saqqummersitsinerit aalisarnermut atortunik aalisariutinik, motoorinut, gearinut, elektronikimik atortorissaarutinik, GPS-nik skærminillu nutaanik pisinernut atortarpaat.

- Saqqummersitsinerni nutserinernut naatsorsuinernillu ikiuussinnaavugut – amerlasuunullu tuniniaasunik naapitsinerni peqataasarnerput toqqissisimanarineqartarpoq, uagummi ataasiakkaanut tunngatillugu apeqqutit eqqortut apeqqutigisinnaavagut eqqortunillu akissutissarsilluta. Aalisartorpassuarnut tunisisartut Savalimmiuneersuummata, Danmarkimeersuullutik, Norgemeersuullutik Canadameersuullutillu nutserineq pisariaqartarpoq.

Taamattaaq Aapisi aalisartunut piniartunullu pikkorissartitsinernik aaqqissuisarpoq.

- Ikiuuttussanngorluta pilersitaavugut. Taamaammat attuumassuteqartut amerlasuut – sullissinermi, aningaasaqarnermi sillimmasersuinermilu namminersortut siunnersuisartut suleqatigisarpavut, suliffeqarfinnimmi namminersortunik unammillertussaanngilagut. Peqatigisaanik ilinniarfiit suliffeqarfiillu namminersorlutik oqartussanit pigineqartut – ilaatigut Saviminilerinermik ilinniarfik, Imarsiornermik Ilinniarfik, Tusass, INUILI allallu pikkorissarnernik aalisarnermut piniarnermullu inuussutissarsiortunut sammititanik suleqatigisarpavut.

- Tamatuma saniatigut nittartakkakkut qupperneq nutaaq pilersipparput (www.aapisi.gl), tassanilu inatsisit attuumassuteqartut tamaasa katersorpagut, taamaalilluni aalisarnermik piniarnermillu inuussutissarsiortunit pisariitsumik iserfigineqarsinnaanngorlugit, Siverth Amondsen nassuiaavoq.